მოდისა და ნარკოტიკების სამყაროს სიახლოვის შესახებ ბევრი თქმულა. მსოფლიო მოდის სამყაროში ბევრი მოდელია გატაცებული ნარკოტიკების მოხმარებით. პრესასა და კრიმინალურ ქრონიკებშიც ბევრი ინფორმაციის პოვნა შეიძლება ყოფილ მოდელებზე, რომლებიც თავადაც ვაჭრობენ ნარკოტიკებით.უფრო ხშირად ფულის შოვნის ამ არალეგალურ საშუალებას ის გოგონები ირჩევენ, რომლებმაც ახალგაზრდობაში სხვა პროფესიის შეძენა ვერ მოახერხეს, ვერ მიაღწიეს სათანადო სიმაღლეებს მოდის ბიზნესში და ვერც წარმატებულად გათხოვდნენ. თუმცა ხანდახან ნარკოვაჭრობაში მაღალი დონის ვარსკვლავებიც დაუდანაშაულებიათ.
ცოტა ხნის წინ გაჩნდა ცნობები, რომ სახელგანთქმული მოდელი და მსახიობი ამბერ ვალეტა დიდი რაოდენობით მარიხუანას ყიდდა, თუმცა ბრალდება დაუდასტურებელი დარჩა. აი, ბრიტანელი სუპერმოდელი ჯოდი კიდი კი 2007 წელს კოკაინის გავრცელებაზე “ჩავარდა” - მან გადაცმულ რეპორტიორებს შესთავაზა ნარკოტიკების შეძენა.
თუმცაღა ყველაზე ხშირად მოდელებისა და ნარკოტიკების შესახებ სკანდალები მაინც არა ვაჭრობას, არამედ ნარკოტიკების მოხმარებას უკავშირდება. ბევრი გოგონა შოუბიზნესში ჯერ კიდევ მოზარდი ხვდება, რაც ამ მავნე ჩვევით დაავადების შანსებს ზრდის.
ზოგიერთებს უმართლებთ კიდეც, მაგალითად, კეიტ მოსმა, რომლის რეპუტაციაც თითქოსდა მთლიანად დაანგრია 2005 წელს აგორებულმა კოკაინის სკანდალმა, მაინც შეძლო რეაბილიტაცია, მოდური ჟურნალების გარეკანებზეც დაბრუნდა და წარმატებული კონტრაქტებიც მიიღო.
ბევრისთვის კი ეს ტრაგედიით მთავრდება. დღეს ბევრს აღარ ახსოვს ერთ-ერთი პირველი სუპერმოდელი ჯია კარანჯი, რომელიც 1970-იანი წლების ბოლოს ბრწყინავდა ჟურნალების გარეკანებზე. 1986 წელს 26 წლის ჯია შიდსით გარდაიცვალა. ამ დაავადებასა და გარდაცვალებას კი წინ უძღოდა კოკაინისა და ჰეროინის რამდენიმეწლიანი მოხმარება.
ჟურნალი "რეიტინგი"
(გამოდის ორშაბათობით)
