ჩაფიძის კლინიკაში, სადაც დეკანოზი გიორგი მამალაძე მოათავსეს, მისი ადვოკატი მივიდა

ჩაფიძის კლინიკაში, სადაც დეკანოზი გიორგი მამალაძეა გადაყვანილი, მისი ადვოკატი გიორგი ფანცულაია მივიდა. მისთვის ამ დროისთვის უცნობია, თუ რა დიაგნოზით გადაიყვანეს დეკანოზი ნომერ მე-9 პენიტენციური დაწესებულებიდან საავადმყოფოში. ადვოკატი დეტალების გარკვევას ადგილზე ცდილობს.

დეკანოზი გიორგი მამალაძე პენიტენციური დაწესებულებიდან ჩაფიძის კლინიკაში ცოტა ხნის წინ გადაიყვანეს. აღნიშნული ინფორმაცია "ინტერპრენიუსს" სასჯელაღსრულების სამინისტროში დაუდასტურეს.

როგორც ცნობილია, დღეს მისმა ადვოკატმა გიორგი ფანცულაიამ განაცხადა, რომ მამა გიორგი მამალაძეს უკვე მეოთხე დღეა აღენიშნება მაღალი ტემპერატურა და პერიოდულად აქვს წნევის პრობლემა. "მას კვლავ აღენიშნება მაღალი ტემპერატურა, ასევე პერიოდულად აქვს წნევის პრობლემები. უტარდება შესაბამისი გამოკვლევები და მკურნალობა. სამედიცინო კუთხით ციხის ადმინისტრაციასთან პრობლემები არ აქვს, ვინაიდან, რაც შესაძლებელია, ყველანაირი მკურნალობა უტარდება, თუმცა ამის მიუხედავად, სამწუხაროდ, მისი ჯანმრთელობის მდგომარეობა უკვე მეოთხე დღეა არ დასტაბილურებულა", - განაცხადა გიორგი ფანცულაიამ.

დეკანოზი გიორგი მამალაძე 2017 წლის 10 თებერვალს დააკავეს. საქართველოს მთავარი პროკურატურის განცხადებით, ის მკვლელობის მომზადების ფაქტზეა დაკავებული. უწყების ინფორმაციით, გამოძიება 2017 წლის 2 თებერვალს ერთ-ერთი მოქალაქის განცხადების საფუძველზე დაიწყო, რომელმაც საქართველოს პროკურატურას მიმართა და მიუთითა, რომ მისმა ნაცნობმა მამა გიორგი მამალაძემ სთხოვა სიცოცხლისთვის საშიში შხამიანი ნივთიერების - ციანიდის მოძიებაში დახმარება, რომლის გამოყენებითაც ამ უკანასკნელს, უნდა მოეხდინა მაღალი იერარქიის სასულიერო პირის სიცოცხლის ხელყოფა. პროკურატურაში არ აკონკრეტებენ, იყო თუ არა ეს მაღალი იერარქიის სასულიერო პირი სრულიად საქართველოს კათოლიკოს- პატრიარქი.

საქართველოს კათოლიკოს-პატრიარქის ილია მეორეს განცხადებით, კი ის დიდიხანია იცნობს დეკანოზ გიორგი მამალაძეს და დასძენს, რომ მასზე კარგის მეტი არაფერი სმენია და უნახავს. უწმინდესმა აღნიშნული განცხადება, ბერლინში გააკეთა და დასძინა, რომ დეკანოზის ირგვლივ განვითარებული მოვლენები უცნაური და არანორმალურია. "მინდა შევეხო იმ უცნაურ და რაღაც არანორმალურ სიტუაციას, რომელიც დაკავშირებულია მამა გიორგი მამალაძესთან. მე ვიცნობ მამა გიორგის უკვე კარგა ხანია და კარგის მეტი მე არაფერი მომისმენია და მინახავს მისგან", - განაცხადა ილია მეორემ.