რიყის ტერიტორიის გასხვისების საქმეზე ნიკა გილაური დაიკითხა

რიყის ტერიტორიის გასხვისების საქმეზე ნიკა გილაური დაიკითხა

რიყის ტერიტორიის გასხვისების საქმეზე ნიკა გილაური ფინანსთა მინისტრობის პერიოდში დედაქალაქის ბიუჯეტისთვის თანხის გამოყოფის საკითხზე დაიკითხა.

თბილისის საქალაქო სასამართლოში გიგი უგულავასა და დავით კეზერაშვილის წინააღმდეგ აღძრულ საქმეზე ნიკა გილაურს შეკითხვები პროკურორებმა დაუსვეს, გასხვისებული რიყის ტერიტორიის გამოხსნის ეპიზოდზე. კერძოდ, პროკურატურა დაინტერესდა იმ თანხის მიზნობრიობით, რომელიც ნიკა გილაურის ფინანსთა მინისტრობის დროს დედაქალაქის ბიუჯეტისთვის 25 მილიონის სახით გამოიყო.

როგორც გილაურმა სასამართლო პროცესზე დაკითხვის შემდეგ განაცხადა, უსაფუძვლო იყო პროკურატურის შეკითხვები იმ მოტივით, რომ ბიუჯეტიდან გაღებული თანხების მიზნობრიობას იმ პერიოდში არ განსაზღვრავდა.

"მაგ დროს მე ფინანსთა მინისტრი ვიყავი. თანხები, რომელიც გამოიყო პარლამენტში გვაქვს წარდგენილი საბიუჯეტო ცვლილებების სახით. გამოდის, რომ რაზეც პროკურატურა დავობს, ის თანხა მთავრობამ დაამტკიცა. ეს ცვლილებები შევიდა პარლამენტში, მან განიხილა, დაამტკიცა, მერე შევიდა პრეზიდენტთან, მანაც ხელი მოაწერა, მერე თბილისის მთავრობამ დაამტკიცა და მერე საკრებულომ განიხილა და დაამტკიცა. ამის შემდეგ კი თანხები დაიხარჯა. დავობენ რატომ დახარჯა თბილისის მერიამ ეს თანხა, წარმოიდგინეთ, რომ აბსოლუტურად ყველა თანხაზე, რომელიც დღეს იხარჯება, ასეთივე ლოგიკით შეიძლება დაისვას კითხვის ნიშნის ქვეშ, იგივე ლოგიკით შეიძლება დაისვას კითხვა, რატომ იყო ეს თანხა ხელფასებისთვის და პენსიისთვის განსაზღვრული ბიუჯეტიდან, ასევე გზებისთვის. ყველაფერი რაც ბიუჯეტშია გაწერილი პარლამენტის მიერ არის დამტკიცებული", - განაცხადა ნიკა გილაურმა.

მისი განცხადებით, ბიუჯეტიდან განსაზღვრული თანხები იხარჯებოდა მაშინაც და იხარჯება დღესაც.

"საუბარია თანხაზე, სადაც ყველა პროცედურა დაცულია. კითხვას სვამს პროკურატურა, თუ რატომ დახარჯა ეს თანხები თბილისის მერიამ. თანხის მიზნობრიობა ჩემს მოვალეობაში არ იყო და როგორ იქნებოდა, როდესაც თბილისის აქვს თავისი საკრებულო, რომელიც ბიუჯეტის მიზნობრიობას განსაზღვრავს. პროკურატურამ არადამადასტურებელი კითხვა დამისვა", - განაცხადა ნიკა გილაურმა.

გიგი უგულავასა და დავით კეზერაშვილის წინააღმდეგ სასამართლო პროცესზე, რომელიც რიყისა და "ტელეიმედის" გასხვისების საქმეს ეხება, დღეს ნიკა გილაურის გარდა, კიდევ სამი მოწმე დაიკითხა.

"ინტერპრესნიუსი"

ბესიკ თამლიანმა საპატიმრო დატოვა - პროკურატურის განმარტება

საგამოძიებო სამსახურმა თბილისში კომერციული ობიექტი დახურა, სადაც 600-მდე პირია დასაქმებული - "თანამშრომლების ნაწილს მაღალი სიცხე აქვს"

ქუთაისში მომხდარ მკვლელობაზე ახალი დეტალები ხდება ცნობილი