რას ჰყვებიან სტამბოლის თავდასხმას გადარჩენილები

რას ჰყვებიან სტამბოლის თავდასხმას გადარჩენილები

სტამბოლში, ახალი წლის ღამეს მომხდარმა თავდასხმამ ადგილობრივი მოსახლეობისა და ტურისტების სიმშვიდე კიდევ ერთხელ დააფრთხო. თურქი სამართალდამცავები ჩხრეკენ და ამოწმებენ ყველა საეჭვო ადგილსა და ადამიანს. ადგილობრივმა მედიამ გამოაქვეყნა ვიდეო, სადაც მათივე განცხადებით, ის შეიარაღებული ეჭვმიტანილია აღბეჭდილი, რომელიც ახალი წლის ღამეს, სტამბოლის ღამის კლუბში შევარდა და 39 ადამიანი მოკლა, 70 კი დაჭრა...

შეიარაღებულმა პირმა, რომელსაც სანტა კლაუსის სამოსი ეცვა, ღამის კლუბ "რეინაში" შესვლამდე, პოლიციელი და სამოქალაქო პირი მოკლა. იმ დროისთვის კლუბში დაახლოებით 600 ადამიანი იმყოფებოდა, მათ შორის, უცხოელები. ზოგიერთმა თავს ბოსფორის სრუტეში გადახტომით უშველა. სამართალდამცველების თქმით, შეიარაღებული თავდამსხმელი კლუბიდან გამოსულ ხალხს შეერია...

კლუბ "რეინაში" მომხდარ თავდასხმას ბედნიერი შემთხვევით გადაურჩა კიეველი ოქსანა, რომელიც სტამბოლში ახალი წლის შესახვედრად იმ ღამეს ჩაფრინდა.

"მეგობრებთან ერთად ვიყავით კლუბში. როგორც კი ფეიერვერკების აფეთქებისა და შამპანურების გახსნის ხმები მიწყნარდა, უცებ ავტომატის რამდენიმე ჯერი გავიგეთ და ხალხი მოცელილივით დაცვივდა ძირს... მართლაც სასწაულის ძალით გადავრჩი, შიშისგან იატაკზე დავეცი და ხალხის ტალღამ მაგიდის ქვეშ შემაგდო. ვეღარც ავდექი. პოლიციელების თქმით, მკვლელმა 7 მჭიდი დაცალა... კლუბში 700-მდე ადამიანი იქნებოდა. სროლას პანიკა მოჰყვა... სასტუმრო "ინტერკონტინენტალში" ვიყავით დაბინავებული. ერთი კვირით ვაპირებდით დარჩენას, მაგრამ მეორე დღესვე წამოვედით უკან... ასე მგონია, სტამბოლში და ზოგადად, თურქეთში, უსაფრთხო ადგილი უკვე აღარ არსებობს" - აცხადებს გადარჩენილი.

სტამბოლის ღამის კლუბზე თავდასხმას, უკვე მოჰყვა დაკავების ახალი სერია, - ხელისუფლებამ თავდასხმასთან დაკავშირებით, სტამბოლის ათათურქის აეროპორტში ორი უცხოელი დააკავა. ასევე, არსებობს ინფორმაცია, რომ თავდასხმის შემდეგ, სხვადასხვა დროს, სხვადასხვა ადგილას, 8 ადამიანი დააკავეს.

ადგილობრივი მედიის ინფორმაციით, ღამის კლუბზე თავდასხმამდე სამი დღით ადრე, სტამბოლსა და დანარჩენ თურქეთში, "ისლამური სახელმწიფოს" 63 ეჭვმიტანილი მებრძოლი დააკავეს. მათგან ბევრი უცხოელი იყო. შესაძლოა, ღამის კლუბზე თავდამსხმელს კავშირი ჰქონდა იმ ჯგუფთან, რომელმაც გასული წლის ივნისში ათათურქის აეროპორტზე თავდასხმა განახორციელა ...

რამდენიმე დღის წინ, ე.წ. ისლამურმა სახელმწიფომ გაავრცელა ინფორმაცია, რომ თავდასხმა მისმა ერთ-ერთმა "გმირმა ჯარისკაცმა" განახორციელა. მათი სამიზნე თურქეთი იმიტომ გახდა, რომ ის "ჯვრის ქვეყნებს" მიემხრო. მათივე განცხადებით, ღამის კლუბზე იმიტომ გააკეთეს არჩევანი, რომ იქ "ქრისტიანები თავის მოციქულის ამ ქვეყნად მოსვლას ზეიმობდნენ".

თურქეთის მოსახლეობის შიშს საფუძველი ნამდვილად აქვს. გასულ კვირას "ისლამურმა სახელმწიფომ" გამოაქვეყნა ვიდეო, სადაც თავის მომხრეებს თურქეთში თავდასხმებისკენ მოუწოდა. თავის მხრივ, ერდოღანის ხელისუფლება სირიის სტრატეგიულად მნიშვნელოვანი ქალაქის, ალ-ბაბის ტერორისტული დაჯგუფებისგან გათავისუფლებასა და მასზე კონტროლის დამყარებას ცდილობს. ერთოღანის ხელისუფლების წევრთა განცხადებით, ივლისში ჩაშლილი გადატრიალების შემდეგ, შემოღებული საგანგებო მდგომარეობა ტერორის საფრთხის დასრულებამდე ძალაში დარჩება. თურქი სამხედრო ექსპერტების თქმით, სტამბოლში მომხდარი თავდასხმა მეოთხე და ყველაზე სისხლიანი თავდასხმაა. მათივე თქმით, ბოლო დროინდელი მოვლენების მიხედვით, თურქეთში დაუცველობის განცდა ყოველდღიურად იზრდება, რადგან უსაფრთხოების ძალებს, ტერორისტული თავდასხმების პრევენციის უნარი არ შესწევთ.

ლალი პაპასკირი

AMBEBI.GE

"ტელეფონი დავამტვრიე, ჩემები რომ დამირეკავდნენ, რუსს არ ეთქვა: აქ ბევრი მკვდარია, თქვენ რომელი გინდათო..." - შინდისის ბრძოლას გადარჩენილის ნაამბობი

83 წლის მამაკაცი, რომელიც კახეთში პოლიციელებს თავს დაესხა, გირაოს სანაცვლოდ გათავისუფლდა

"დღეს გულისამაჩუყებელი ამანათი მივიღეთ..." - უცნობი ამერიკელი ჯარისკაცის წერილი ავღანეთში დაღუპულ ქართველ მებრძოლზე