"ავიადარტყმების შემდეგ, ადამიანები მიწაზე ეცემოდნენ და იხუთებოდნენ..." - ქიმიური იარაღის გამანადგურებელი კვალი სირიაში

"ავიადარტყმების შემდეგ, ადამიანები მიწაზე ეცემოდნენ და იხუთებოდნენ..." - ქიმიური იარაღის გამანადგურებელი კვალი სირიაში

სირიაში, სავარაუდოდ, ქიმიური იარაღის გამოყენების შემდეგ, დაღუპულთა რიცხვი 74-მდე გაიზარდა და მათგან 20 ბავშვია. ამის შესახებ ბრიტანეთში დაფუძნებული ორგანიზაცია "სირიის ადამიანის უფლებათა ობსერვატორია" იუწყება... სირიის პროვინცია იდლიბში, ქალაქ ხენ-შეიხუნში, 4 აპრილს გამთენიისას თავდასხმა მაშინ განხორციელდა, როდესაც მოსახლეობას ჯერ კიდევ ეძინა. ტელეკომპანია "ალ ჯაზირას" ინფორმაციით, გარდაცვლილთა რაოდენობა 100-საც აღწევს, რადგან არიან ისეთებიც, რომლებიც ამჟამად უგზო-უკვლოდ დაკარგულებად ითვლებიან და მათი უმრავლესობა ბავშვია...

სირიელი უფლებადამცველების ცნობით, ავიადარტყმები სირიულმა ან რუსულმა ავიაციამ განახორციელა. თუმცა, "ბი-ბი-სი-ს" ცნობით, რუსული მხარე აცხადებს, რომ ამ რაიონში მათი ავიაცია არ მოქმედებდა.

საერთაშორისო მედიის ინფორმაციით, სირიელი სამხედროები ქიმიური იარაღის გამოყენებას უარყოფენ, თუმცა, ამერიკელი სამხედრო ექსპერტების თქმით, სიმპტომები და გამოხატულება, რომელიც თავდასხმის შედეგად დაღუპულ და დაზარალებულ მსხვერპლს ჰქონდა, ქიმიური იარაღით გამოყენების შემდეგ მიღებულს ჰგავს: ავიადარტყმების შემდეგ, ადამიანები მიწაზე ეცემოდნენ და იხუთებოდნენ, მათ უმრავლესობას ღებინება აღენიშნებოდა და პირზე ქაფი ჰქონდა...

მოგვიანებით, ავიადარტყმები იმ საავადმყოფოებზეც განხორციელდა, სადაც დაზარალებულებს მკურნალობდნენ. სააგენტო "ფრანს-პრესის" ჟურნალისტი იხსენებს, რომ დაინახა გოგონა, ქალი და ორი ასაკოვანი ადამიანი, მათ პირზე ქაფი ჰქონდათ და ისინი საავადმყოფოში დაიღუპნენ...

სირიელი ოპოზიციონერი აქტივისტების ინფორმაციით, გამოყენებული იყო გაზი, რომელსაც ნერვულ-მაპარალიზებელი მოქმედება ახასიათებს, რომლის ზემოქმედების შედეგადაც, სიკვდილი რამდენიმე წუთში დგება. ამ ფაქტის გარშემო უკვე მსჯელობს გაერო, თუმცა ორგანიზაციას არ გააჩნია ზუსტი ინფორმაცია, თუ კონკრეტულად რომელი ქიმიური ნივთიერება იქნა გამოყენებული ხან შეიხუნზე თავდასხმისას.

ადგილობრივი სამედიცინო პერსონალის ვარაუდით, საუბარია, "ზარინზე" - უფერო, უსუნო აირზე, რომელიც ე.წ. არასუფთა სახითაც მოიპოვება. "სუფთა სახით" გამოყენების შემთხვევაში, ერთი სუფრის კოვზის ოდენობის აირს, ჰაერში გაფანტვიდან 4 წუთის განმავლობაში, ერთი მჭიდროდ დასახლებული უბნის სრული ლიკვიდაცია შეუძლია. ამ დროს ჰაერის ერთი შესუნთქვის შემდეგ, ადამიანი მხოლოდ 3-4 წუთი ცოცხლობს...

სირიელი აქტივისტების თქმით, ქალქ ჰან-შეიხუნში საჰაერო დაბომბვის შემდეგ, ადამიანებს სუნთქვა გაუჭირდათ. მათივე მოსაზრებით, ავიადარტყმები სირიულმა ან რუსულმა ავიაციამ განახორციელა. თვითმხილველების თქმით, დაბომბვის შემდეგაც ბევრი ადამიანი გაიგუდა...

სირიელი აქტივისტების თქმით, როდესაც თავდასხმა მოხდა ადგილობრივ საავადმყოფოებზე, ამან მოსახლეობა პანიკაში ჩააგდო, - "იმ ადამიანებმა, ვისაც ოჯახის წევრები საავადმყოფოში ჰყავდათ, დაბომბვის შემდეგ, იმპულსურად მათკენ წასვლა გადაწყვიტეს და "გაქრნენ", არავინ იცის, სად არიან... სავარაუდოდ, მოიწამლნენ" - ამბობენ ისინი...

სირიის ჯარი აცხადებს, რომ მათ ქიმიური თავდასხმა არ განუხორციელებიათ, რუსი სამხედროების ინფორმაციით კი, ავიადარტყმები მეამბოხეების იარაღის საცავებზე მოხდა, სადაც ისინი ქიმიურ იარაღსაც ინახავდნენ.

ეს პირველი შემთხვევა არ არის, როდესაც სირიაში ქიმიური იარაღის გამიყენებაზე საუბრობენ, - გაეროს არაერთ მოხსენებაში ნათქვამია, რომ სირიაში 2011 წლის მარტიდან მოყოლებული, ქიმიური იარაღის გამოყენების ათამდე ფაქტი დაფიქსირდა. გაეროს გამომძიებლების ცნობით, მომაკვდინებელი ნერვული გაზის "ზარინის" გამოყენება არაერთხელ მოხდა.

გაეროს სხვადასხვა დროს გაკეთებულ სხვადასხვა მოხსენებაში აღნიშნულია, რომ რამდენიმე შემთხვევისას, ქიმიურ თავდასხმას სამოქალაქო პირები და სამხედროები ემსხვერპლნენ, რის გამოც რთული ხდება იმის დადგენა, რომელი მხრიდან მოხდა თავდასხმების განხორციელება.

გაეროს გამომძიებლის ეიკ სელსტრომის გამოძიების თანახმად, 2013 წელს ქიმიური იარაღი რამდენჯერმე გამოიყენეს, - მარტში ხან ალ-ასალში; აპრილში - სარექებში; აგვისტოში დამასკოსთან ახლოს - ჯობარსა და აშრაფიათ საჰნაიში.

უფრო ადრე, 2012 წლის აგვისტოში, დამასკოსთან ახლოს, ქიმიური იარაღის გამოყენებას 1 400 ადამიანზე მეტი ემსხვერპლა, რაშიც ოპოზიცია და მთავრობა ერთმანეთს ადანაშაულებდა. ამის შემდეგ, სირიის პრეზიდენტი ბაშარ ალ-ასადი ქვეყანაში არსებული ქიმიური იარაღის განადგურებას დათანხმდა და სირია ქიმიური იარაღის კონვენციასაც მიუერთდა. მაშინ, გაეროს უშიშროების საბჭომ სპეციალური რეზოლუციაც მიიღო, რაც სირიის ქიმიური იარაღის 2014 წლის შუა პერიოდისათვის მთლიანად განადგურებას ითვალისწინებდა. მის განადგურებაზე მეთვალყურეობა ქიმიური იარაღის ამკრძალავ ორგანიზაციას დაევალა...

ბოლო შემთხვევაზე პასუხისმგებლობას, შეერთებული შტატები და დასავლეთის სხვა ქვეყნები სირიის პრეზიდენტს აკისრებენ. თუმცა, რუსეთი, რომელსაც გაეროს უშიშროების საბჭოში ვეტოს უფლება აქვს, თავის მოკავშირეს ასადის ხელისუფლებას იცავს; - მოსკოვში ამბობენ, რომ ბაშარ ალ-ასადის მხარდასაჭერად სირიაში სამხედრო ოპერაცია გაგრძელდება და რუსეთი დიდ სამხედრო და დიპლომატიურ მხარდაჭერას უწევს სირიის პრეზიდენტს.

რუსული მედიის ინფორმაციით, იდლიბის გარეუბანი სირიის არმიის ავიაციის მიერ დაიბომბა და მათი სამიზნე, ჯჰაბრათ ალ ნუსრას (იგივე ალ ქაიდა) რაზმების სამხედრო საწყობი იყო. მათივე თქმით, ყველა საავიაციო მოქმედება, რომელსაც რუსული და სირიული ავიაცია ახორციელებს, კოალიციის წარმომადგენლებთან შეთანხმებით ხდება, რათა საჰაერო სივრცეში ინციდენტები არ მოხდეს და მხარეებმა ერთმანეთს ე.წ. მეგობრული ცეცხლი არ გაუხსნან.

რამდენიმე დღის წინ ამერიკის პრეზიდენტმა დონალდ ტრამპმა განაცხადა, რომ ასადის რეჟიმის შეცვლა მათთვის პრიოტიტეტი არ არის, თუმცა, შესაძლოა, ამ ფაქტის შემდეგ მას პრიორიტეტების და პოზიციის გადახედვამ მოუწიოს...

სირიული მედიის თქმით, იდლიბის გარეუბნიდან სირიის არმიის ნაწილები საკმაოდ შორის არიან და ქიმიური იარაღის გამოყენება, მხოლოდ საავიციო შეტევით იყო შესაძლებელი. სირიელი სამხედროების თქმით, ასადის არმიამ ძალიან მცირე რაოდენობით ქიმიური იარაღი გამოიყენა, სხვა შემთხვევაში მსხვერპლი ასობით ადამიანი იქნებოდა...

ლალი პაპასკირი

AMBEBI.GE

"ტელეფონი დავამტვრიე, ჩემები რომ დამირეკავდნენ, რუსს არ ეთქვა: აქ ბევრი მკვდარია, თქვენ რომელი გინდათო..." - შინდისის ბრძოლას გადარჩენილის ნაამბობი

83 წლის მამაკაცი, რომელიც კახეთში პოლიციელებს თავს დაესხა, გირაოს სანაცვლოდ გათავისუფლდა

"დღეს გულისამაჩუყებელი ამანათი მივიღეთ..." - უცნობი ამერიკელი ჯარისკაცის წერილი ავღანეთში დაღუპულ ქართველ მებრძოლზე