რუსეთის დუმის სპიკერმა სომხეთს რუსული ენისთვის ოფიციალური სტატუსის მინიჭება შესთავაზა

რუსეთის სახელმწიფო დუმის სპიკერმა ვიაჩესლავ ვოლოდინმა სომხეთის ხელისუფლებას ახლი ინიციატივა წაუყენა, - მან სომხეთში რუსული ენის ოფიციალური სტატუსის მინიჭება შესთავაზა. შეთავაზების მიზეზად კი სომხური მართვის მოწმობის რუსეთის ტერიტორიაზე აღიარება დაასახელა.

საქმე ის არის, რომ 2017 წლის 1 ივნისიდან, რუსეთში ახალი კანონმდებლობის შესაბამისად, უცხო ქვეყნის მართვის მოწმობით რუსეთის ტერიტორიაზე მუშაობა აიკრძალა. ამასთან, 14 ივლისს, სახელმწიფო დუმამ მიიღო კანონი, რომლის მიხედვითაც, სხვადასხვა ქვეყნის მოქალაქეებისთვის, მათ შორის ყირგიზეთისთვის, რუსულ ენას სახელმწიფო ენის სტატუსი აქვს და მათ რუსეთის ტერიტორიაზე მძღოლად მუშაობა ლეგალურად შეუძლიათ.

რაც შეეხება რუსეთის ტერიტორიაზე სომხეთის მართვის მოწმობის აღიარების საკითხს, ეს თემა დუმის სპიკერთან შეხვედრის დროს სომხეთის პარლამენტის თავმჯდომარემ არა ბაბლოიანმა წამოჭრა. ბაბლოიანის თქმით, რუსეთში ახალი რეგულაციის ამოქმედების შემდეგ სომხეთის მოქალაქეებმა, რომლებიც მძღოლებად მუშაობდნენ, სამსახურები დაკარგეს.

სომეხი მაღალჩინოსნის საყვედურს ვოლოდინმა ახალი ინიციატივა შეაგება – "არსებობს ასეთი გამოსავალი, რომელსაც მე თქვენ გთავაზობთ, - მიანიჭეთ რუსულ ენას ოფიციალური სტატუსი და კანონის აღნიშნული ნორმა ავტომატურად სომხეთის რესპუბლიკაზეც გავრცელდება", - განაცხადა რუსეთის სახელმწიფო დუმის თავმჯდომარემ სომეხ კოლეგასთან შეხვედრისას.

სომხური მხარე უკვე გამოეხმაურა ვოლოდინის ინიციატივას. "ჩვენ არ ვაპირებთ სომხეთში რუსული ენისთვის ოფიციალური სტატუსის მინიჭებას და მძღოლებისთვის სამსახურის პრობლემის ამგვარად მოგვარებას" - ამის შესახებ EADaily -სთან საუბრისას სომხეთის პარლამენტის ვიცე-სპიკერმა ედუარდ შარმაზონოვმა განაცხადა, რომლის თქმითაც, სომხეთში ერთადერთი ოფიციალური ენა სომხურია და ეს არის რეალობა.

"ჩვენს ქვეყანაში ერთადერთი ოფიციალური ენა სომხურია და ეს არის კონსტიტუციური ნორმა. ამ რეალობის შეცვლა კი შეუძლებელია" - განაცხადა შარმანაზოვმა ვოლოდინის ინიციატივის შეფასებისას.

ამასთან, სომხური მხარის მიერ გავრცელებული ოფიციალური ინფორმაციით,"რუსული ენა სომხეთის ყველა სკოლაში ისწავლება, შესაბამისად, რუსული ენის ცოდნა სავსებით საკმარისია. მხარეები შეთანხმდნენ, რომ აღნიშნულ საკითხს მომავალში დაუბრუნდებიან".

სომეხი ექსპერტების თქმით, ვოლოდინის შეთავაზება საკმაოდ არაკორექტული და კითხვის ნიშნების შემცველი იყო.

საქმე ის არის, რომ რუსული მედია მუდმივად წუხს იმაზე, თუ როგორ იკარგება რუსული ენა პოსტსაბჭოთა ქვეყნებში, - იქ ასაკოვანმა ადამიანებმა თუ იციან რუსული, ახალი თაობა ამ ენაზე თითქმის არ საუბრობს, - ეს ეხება სომხეთს, აზერბაიჯანსა და საქართველოს" - წერდა რამდენიმე წლის წინ "რუსკი მირის" ჟურნალისტი ალა ბერეზოვსკაია, რომლის თქმითაც, საქართველოში ყველა რუსული სკოლა დახურეს.

ამასთან, რუსი ჟურნალისტები მუდმივად სვამდნენ რიტორიკულ კითხვას რუსეთის მიმართ განსაკუთრებით კეთილგანწყობილ სომხეთზე, - გადარჩება კი რუსული ენა იმ ქვეყანაში, რომელიც მთავარ სტრატეგიულ პარტნიორად რუსეთს მიიჩნევს?!. – წერდნენ ისინი და თავიანთ პუბლიკაციებში სამოქმედო კონცეფციის ამოქმედების გზებზე საუბრობდნენ...

ლალი პაპასკირი

ამბები. გე