#53-ე სკოლაში აქცია დასრულდა, თუმცა პროტესტი გრძელდება

თბილისის #53-ე სკოლის ეზოში მოსწავლეებისა და მასწავლებლების აქცია დასრულდა. როგორც სკოლის სამეურვეო საბჭოს თამჯდომარემ, ქეთევან ნიჟარაძემ განაცხადა, სასწავლო პროცესი მაშინვე აღდგება, როდესაც მარიამ რამინიშვილთან დაკავშირებული ბრძანება გაუქმდება.

"კიდევ ერთხელ გვინდა გავიმეოროთ, რომ მინისტრი არის შეცდომაში შეყვანილი, გენინსპექციის დასკვნა კი არის არაკვალიფიციური და უსმართლო. #53-ე საჯარო სკოლის პედაგოგიური კოლექტივი განაგრძობს გაფიცვას მანამ, სანამ არ დაკმაყოფილდება ჩვენი მოთხოვნები. კერძოდ, გაბათილდეს მარიამ რამინაშვილთან დაკავშირებული უკანონო ბრძანება და სასწავლო პროცესი აღდგება", - აღნიშნა ქეთევან ნიჟარაძემ.

#53-ე სკოლის პედაგოგის, მარინა ბასილაშვილის თქმით, განათლების სამინისტრომ გადაწყვეტილება სწრაფად უნდა მიიღოს. "ჩვენ გვინდა, რომ გადაწყვეტილება მიღებული იქნას ძალიან მალე, რათა სასწავლო პროცესი აღდგეს. ამაზე ჩვენზე მეტად არავინ ნერვიულობს, ამიტომ აქ არის ორნაირად დასმული საკითხი. ერთი - ჩვენ ვამბობთ, რომ არ შევწყვეტთ პროტესტს, სანამ მარიამი არ დაუბრუნდება სამუშაო ადგილს. თუ ასე არ მოხდება, მაშინ დროზე მიიღონ გადაწყვეტილება და 98 პედაგოგი გაგვათავისუფლონ სამსახურიდან. დღეს როგორც ახალმა დირექტორმა ბრძანა, რიგი არის მასწავლებლების, რომლებსაც უნდათ მუშაობა და სურთ მიიღონ ის მასწავლებლები", - განაცხადა მარინა ბასილაშვილმა.

#53-ე საჯარო სკოლასთან აქცია დილიდან მიმდინარეობდა. აქციის მონაწილეები სკოლის ყოფილი დირექტორის, მარიამ რამინაშვილის თანამდებობაზე აღდგენას ითხოვდნენ. მოსწავლეებმა და მასწავლებლებმა მოახდინეს სკოლის შესასვლელების ბლოკირება, რითაც ახლად დანიშნულ დირექტორს, ეკა გახარიას შენობაში შესვლის საშუალება არ მისცეს.

"ინტერპრესნიუსი"