გამომცემლობა "პალიტრა L" წიგნის დღესთან დაკავშირებით რუსთაველის თეატრში გამართულ გამოფენა-გაყიდვაში მონაწილეობს.
რუსთაველის თეატრში გამოფენა-გაყიდვა 11:00 საათიდან დაიწყო და 20:00 საათამდე გაგრძელდება.
როგორც "ინტერპრესნიუსს" გამომცემლობა "პალიტრა L"-ის გაყიდვების მენეჯერმა მარიამ ქავთარაძემ განუცხადა, "პალიტრა L" წიგნის მოყვარულებს სხვადასხვა ჟანრის ლიტერატურაზე 20 %-მდე ფასდაკლებას სთავაზობს.
"წიგნის საერთაშორისო დღის აღნიშვნაში ყოველ წელს ვმონაწილეობთ და ჩვენი მომხმარებლისთვის გვაქვს სპეციალური აქციები - ერთს პლუს ერთი, 50%-იანი ფასდაკლებები. როგორც ჩვენმა მომხმარებელმა იცის, "პალიტრა L"-ს აქვე 1500 მეტი დასახელების წიგნი, რომელიც განკუთვნილია როგორც ბავშვებისთვის, ასევე ზრდასრული ადამაინებისთვის. აქ შედის ისტორიული, ასევე საკითხავი, შემეცნებითი და გასართობი წიგნები", - განაცხადა მარიამ ქავთარაძემ.
გარდა ამისა, წიგნის დღესთან დაკავშირებით მაღაზიათა ქსელი "ბიბლუსი" მომხმარებელს 15%-იან ფასდაკლებას სთავაზობს. რუსთაველის თეატრში კი მოქმედებს "ბიბლუსის" კაფე სამკითხველო, სადაც მომხარებელს ახლად შეძენილი წიგნების წაკითხვა შეუძლია.
"ბიბლუსის" მთელ ქსელში დღეს არის 15%-იანი ფასდაკლება ყველა წიგნზე, მხოლოდ ერთი დღით. ამასთან, ვისაც უყვარს ონლაინ შესყიდვები, ჩვენი ელექტრონული მაღაზია www.biblusi.ge დღეს უზრუნველყოფს წიგნების ადგილზე მიტანის უფასო სერვისს. ასევე ქალაქში მოძრაობს "ბიბლუსის" ველოსიპედები - მომხმარებლებს ვურიგებთ საჩუქრად წიგნებს, ყვავილებს, ბუშტებს და ვეცდებით, ეს დღე გავულამაზოთ; დავამკვიდროთ ტრადიცია, რომ წიგნის დღეს ერთმანეთს წიგნები ვაჩუქოთ",-აცხადებს ბიბლუსის მარკეტინგის სამსახურის უფროსი, თათა დგებუაძე.
გამოფენაში, "პალიტრა L"-თან ერთად, საქართველოში არსებული სხვა გამომცემლები და გამავრცელებლებიც მონაწილეობენ. ღონისძიებები საქართველოს წიგნის გამომცემელთა და გამავრცელებელთა ასოციაციის ორგანიზებით, თბილისის მერიისა და საქართველოს კულტურის სამინისტროს მხარდაჭერით ხორციელდება.