ბაქოში გიორგი სუხიტაშვილი სცემეს - რას ჰყვება მომღერალი, რომელიც კონფლიქტის ეპიცენტრში აღმოჩნდა

გუშინ ბაქოში "ნეფტჩისა" და საჩხერის "ჩიხურას" მატჩზე ქართველი ფეხბურთელების საგულშემატკივროდ მომღერალი გიორგი სუხიტაშვილიც იმყოფებოდა, რომელსაც შეურაცხყოფა დაუმსახურებლად მიაყენეს. რამდენიმე მუჯლუგუნი მასაც უთავაზეს.

Ambebi.ge გიორგი სუხიტაშვილს დაუკავშირდა.

- თამაშზე ვიყავი და მთელი ამბავი "ქართული სპორტის ქომაგის" მიერ გამოკიდებულ ბანერს მოჰყვა. არადა, როგორც ვიცი, ეს ბანერი სხვა მატჩებზეც ხშირად გამოუფენიათ და ამაზე პრობლემა არ ყოფილა. მაგრამ იქ, აზერბაიჯანის ტერიტორიაზე, მათ დედაქალაქში გამაღიზიანებლად ჩანდა, პროვოკაციული შინაარსის იყო. მან გულშემატკივრის ყურადღება მიიქცია, რაც მერე სამართალდამცავებთან დაპირისპირებაში გადაიზარდა.

- ხელით შენც შეგეხნენ?

- წასულები ვიყავით კონკრეტული გუნდის, საჩხერის "ჩიხურის" საგულშემატკივროდ. ტრიბუნებზე ვისხედით, არც დამინახავს ის ბანერი და არც ის, მასზე რა ეწერა, მაგრამ დავინახე, რომ მოვიდა კლუბის დირექტორი და "ქართული სპორტის ქომაგებს" სთხოვა, იქნებ აიღოთ, გულშემატკივარი გაღიზიანდაო. ქომაგები ამბობდნენ, ბანერს არ ავიღებთო, რამაც ჩვენშიც მცირე გაუგებრობა გამოიწვია. დიახ, ჩემთვისაც გაუგებარი გახდა, - თუ გუნდს გულშემატკივრობ, იქ დაკარგული, დათმობილი, თუ გაჩუქებული ტერიტორიების დაბრუნებაზე სენტიმენტალური სლოგანების გაკეთება ცოტა უაზრობა იყო. დიახ, სპორტულ ღონისძიებაზე პოლიტიკური შინაარსის შემცველი სლოგანების გამოკიდება, ჩემთვის, როგორც სპორტის ერთ-ერთი გულშემატკივრისთვის მიუღებელია, იმიტომ, რომ იქ სპორტის საგულშემატკივროდ ვიმყოფები.გასაგებია, რომ ვარ ქართველი, მაგრამ ის ყველაფერი ვიმეორებ, პროვოკაციის ნიშნებს შეიცავდა. მერე გაირკვა, რომ წარმოქმნილ სიტუაციაში მაღალ დონეზე ჩაერივნენ საელჩოები, შინაგან საქმეთა სამინისტროები (აზერბაიჯანის, ჩვენი), ფეხბურთის ფედერაცია, სპორტის სამინისტრო. ეს რომ გულშემატკივრის გულუბრყვილო შეცდომა იყოს, მგონი, დამეთანხმებით, ამხელა აჟიოტაჟი არ მოჰყვებოდა. ეს იყო საკამაოდ სერიოზული, ორ ქვეყანასა და ხალხს შორის დაპირისპირების გაღვივების მცდელობა. ამიტომაც მოჰყვა ის, რაც მოჰყვა.

- ტრიბუნებიდან რომ გაგიყვანეს, რა მოხდა მერე?

- მოვიდა მათი შინაგან საქმეთა მინისტრი, დიალოგი არ მესმოდა, მოშორებით ვიდექი, ითხოვდა, რომ ეს ბანერი მათთვის გადაეცათ და ამით დამთავრდებოდა ის აურზაური. ქომაგებმა არ დათმეს ბანერი და ხელჩართული ბრძოლა, ჩხუბი დაიწყო. ვინაიდან აზერბაიჯანელები ბევრი იყვნენ, ძირს დაცემული "ქართული სპორტის ქომაგების" დასახმარებლად გავიქეცი, რომ გადავფარებოდი. მიუხედავად იმისა, რომ იმ ბანერის შინაარსს არ ვიზიარებდი, უკვე პრინციპის ამბავი იყო, - როდესაც შენი ქვეყნის მოქალაქე განსაცდელშია, უნდა დაეხმარო. მოკლედ, ამ ამბავში მოვყევი და იმ ბიჭებთამ ერთად, ცემა-ცემით ავტობუსში შემათრიეს. მანძილი, რაც ავტობუსამდე გავიარე, რამდენი ადამიანიც იყო, იმდენი იმდენი მუჯლუგუნი მომხვდა.

მიმაჩნია, რომ ეს ამბავი არ უნდა გახდეს, ორი ქვეყნის ურთიერთობაში გარდამტეხი, რადგანაც გულშემატკივრებს შორის დაპირისპირება გაუგებრობის ფონზე მოხდა. მაგრამ სპორტის გულშემატკივარს, იმავე ქომაგებს ვთხოვ, - როდესაც გამაღიზიანებელია და რისკის შემცველია სლოგანები, ასეთ რაღაცებს მოვერიდოთ. ჩვენ ხომ სპორტის გულშემატკივრები ვარ?

მოკლედ, ამ ყველაფერმა გამოიწვია ის, რომ საჩხერის "ჩიხურა" სოლიდური თანხით დაჯარიმდა და კიდევ, როგორც გავიგე, მესხის სტადიონზე განმეორებით მატჩზე სანქცია იმოქმედებს (ერთი ტრიბუნა ცარიელი იქნება). ამ ყველაფრით ჩვენივე გუნდი დავაზარალეთ და მეტი არაფერი. ამიტომ სპორტის გულშემატკივარს ვთხოვ, მეტად სპორტულად მივუდგეთ, ვუგულშემატკივროთ ფეხბურთელებს, რომ მათ მოედანზე შედეგი აჩვენონ.

- მუჯლუგუნების შემდეგ თავს როგორ გრძნობ?

- რომ ვთქვა, სამედიცინო დახმარება დამჭირდა-მეთქი, - არა. უბრალოდ, გაუგებრობაში მოვყევი, - მიუხედავად იმისა, რომ საერთოდ არ მეკუთვნოდა ცემა, მეც მითავაზეს. ინციდენტი მალე აღმოიფხვრა. მადლობა ჩვენს საელჩოს აზერბაიჯანში, ფეხბურთის ფედერაციას.

მაგრამ ვისაც ეს ეხება, თხოვნა მექნება, ამდაგვარი რაღაცები გამოძიებული იყოს. ეს ბანერი ამდენი ხანია დააქვთ, მაგრამ ყურადღება არავის მიუქცევია... ახლა რომ უკვით ეს, მე ეს მაოცებს. თუ ბანერებზე განთავსებული ინფორმაცია სწორია, მაშინ მთავრობამ უნდა დაიცვას გულშემატკივარი. ამჟამად რომ ატყდა ამაზე ამბავი, რა გამოდის, - იქ დადგა აზერბაიჯანის ტერიტორიული მთლიანობის საფრთხე და იქ დაირღვა საერთაშიორისო კონვენცია?! თუ თბილისში გამოვკიდებთ იმ ბანერს, მაშინ აზერბაიჯანული მხარე არ ნახავს და არ გაღიზიანდება? არ მესმის ლოგიკა. ამას ფეხბურთის ფედერაციამაც უნდა მიაქციოს ყურდღება. მართლა სერიოზულად მაინტერესებს, აქამდე ამ ბანერს აქ რატომ არ მიექცა ყურადღება?! მაინტერესებს სიმართლე, რატომ მოხდა ის, რაც მოხდა.

ვიდეო

ლალი ფაცია

სპოეციალურად Ambebi.ge-სთვის