"პარაზიტებად გვთვლიან, თავს კი ზეპურ ერად მიიჩნევენ" - როგორ ექცევიან ქართველ გოგონას რუსეთში

"პარაზიტებად გვთვლიან, თავს კი ზეპურ ერად მიიჩნევენ" - როგორ ექცევიან ქართველ გოგონას რუსეთში

თბილისელი ნატო ნიკოლეიშვილი რამდენიმე თვეა მოსკოვში ცხოვრობს. ახლად ჩასულმა სხვანაირად დაინახა ჩვენი ”დიდი მეზობელი” და საკუთარ შთაბეჭდილებებზე Ambebi.ge-ს ესაუბრება.

- სანამ აქ ჩამოვიდოდი, ბევრისგან მქონდა გაგებული, რომ რუსებს ქართველების მიმართ მონატრების განცდა აქვთ. დიდი ხანია აქ არ ვარ, მაგრამ 4 თვის მანძილზე არავინ შემხვედრია, ვისაც ქართველები ენატრებოდეს. ძალიან ცუდია ის გარემოებაც, რომ ბევრი რუსი ქართველს და მეგრელს ერთმანეთისგან ჰყოფს, ხშირია კითხვა - ქართველი ხარ, თუ მეგრელი?! თუ ეტყვი მეგრელიო, გიფრთხიან და აგრესიას გამოხატავენ, რადგან მიიჩნევენ, რომ უცილობლად უნდა მოატყუო. სამწუხაროა, მაგრამ აქ ბევრი ქართველი იმისთვის, რომ თავი გაიტანოს ძალიან ცუდ რაღაცეებსაც აკეთებს და ეს ყველაფერი უარყოფით გავლენას ახდენს ჩვენს რეპუტაციაზე. ქართველებს გვიყურებენ როგორც მეორეხარისხოვან ერს, ხოლო ესენი ზეპური ერია. აი, როგორც ნაცისტები თვლიდნენ არიულ რასას ყველაზე აღმატებულად, თითქმის ისე არიან ესენიც.

- ანუ რუსები თვლიან, რომ ყველა სხვა ერი თავისი ინტერესებისთვის უნდა გამოიყენონ?

- ვერ გეტყვი მაგას რამდენად ფიქრობენ, მაგრამ ქართველებს პარაზიტებად გვთვლიან. თურმე ჯერ კიდევ საბჭოთა კავშირიდან მოყოლებული რუსები გვარჩენდნენ და მაგათ უნდა ვუმადლოდეთ საერთოდ რომ ვარსებობთ, თურმე რუსების ხარჯზე ვცხოვრობდით, რუსი იკლებდა იმის გამო, რომ ქართველს ეარსება და სხვა. ყოველივე აქედან გამომდინარე გვთვლიან უმადურებად, რადგან ეს ყველაფერი ვერ დავუფასეთ.

- ქართულ კულტურას არ იხსენებენ ხოლმე?

- ქართველის ხსენებაზე პირველი რაც ახსენდებათ, არის სააკაშვილი. როგორც მეუბნებიან, ადრე იყო სტალინი და ახლა სააკაშვილია, როგორც ჩანს 21 დეკემბერს დაბადებულები კარგად ებეჭდებათ გონებაში. აქ ძალიან დიდი პროპაგანდა მიდის სააკაშვილის წინააღმდეგ, რომ ის ძალიან ცუდი ტიპია. ჩვენი ხელისუფლება ხომ ამბობს, რომ რუსეთთან ურთიერთობებს ვალაგებთო, მაგრამ დღევანდელი ხელისუფლება არავის არ ახსოვს, ან უბრალოდ, არ უნდათ რომ იცოდნენ. საქართველო დღემდე ასოცირდება სააკაშვილთან, რომელიც ძალიან არ უყვართ და ბევრს უთქვამს კიდეც - გილოცავთ, რომ მოიშორეთო. სააკაშვილის დიდი მხარდამჭერი არასოდეს ვყოფილვარ, მაგრამ უცხო ქვეყნის მოქალაქისგან, მით უფრო, თუ ეს რუსეთის მოქალაქეა, ჩემი ქვეყნის ექს-პრეზიდენტის ასე მოხსენიება ძალიან გულსატკენია.

- ის, რომ რუსეთი ჩვენი ქვეყნის ოკუპანტია, ამაზე თუ აკეთებს ვინმე აქცენტს?

- რა სისულელეა, პირიქით. უმეტესობა თვლის, რომ ჩვენ აფხაზებს მოვუწყვეთ გენოციდი და რუსებმა ისინი გადაარჩინეს სრული განადგურებისგან, ანუ ჩვენ ვართ ბოროტი ხალხი და რუსები მხსნელები. ასე ფიქრობს თითქმის ყველა. ერთი ნაცნობი ქალია, რომელიც 30 წელია ქართველი კაცის ცოლია, ქმარი სულ უხსნის იმას, თუ რაა რეალობა, მაგრამ ის ისევ ასე ფიქრობს და წარმოიდგინეთ, თუ ეს ვერ გებულობს, სხვა რუსს რა უნდა მოვთხოვოთ?! უკრაინის ამბებზეც თვლიან, რომ რუსეთი კეთილი მიზნებით შევიდა იქ. ეს ყველაფერი არის სატელევიზიო თუ მედია პროპაგანდის შედეგი.

- ნატო, ჩვენთან დღემდე აქტუალურია "მეორე რუსეთის" თემა, როგორ ფიქრობ არსებობს "მეორე რუსეთი?

- პოლიტიკოსებთან არავისთან მისაუბრია, მაგრამ ის პერიოდი, რაც აქ ვარ და ვისაც შევხვედრილვარ იმის მიხედვით თუ ვიმსჯელებთ, "მეორე რუსეთი" ესაა ჩვეულებრივი მითი, თუმცა მითი ზოგჯერ კიდევ უფრო რეალობაა ხოლმე. აქ მე არავისგან გამიგია პრეტენზია არსებული ხელისუფლების მიმართ, პირიქით, უმეტესობას ძალიან მოსწონს კიდეც და თვლიან, რომ პუტინი რუსეთისთვის ღვთის საჩუქარია. პუტინმა სოციალური პირობები გააუმჯობესა, მეორე შვილზე საკმაოდ დიდ დახმარებას აძლევენ ოჯახებს და სხვა. და ხალხს ეს ძალიან მოწონს და პუტინი უკრაინას დაიპყრობს თუ საქართველოს, ეს სრულებით არ ანაღვლებთ, მათთის მთავარია, რომ თვითონ არიან კარგად. ერთადერთი, რაც არ მოსწონთ, საგზაო პოლიციაა. აქაც პრეტენზიას მხოლოდ იმით გამოხატავენ, რომ ფარულად უღებენ ხოლმე ვიდეოებს და ავრცელებენ, მაგრამ არცერთხელ ასეთ ვიდეოს შედეგი არ მოჰყოლია. სხვათა შორის, თუ გზაზე გამხდარი მილიციელი დაინახეს, ხუმრობენ, როგორც ჩანს, ახალი დაწყებული აქვს მუშაობაო.

- ქართველი მომღრელები რომ იყვნენ ჩამოსული, მოგეწონა მათი ეს ქმედება?

- აქ მცხოვრებ ქართველებთან, რომლებიც რუსეთის მოქალქეები არიან, მესიჯები დაიგზავნა და ყველას ეპატიჟებოდნენ კონცერტზე (მგონი მხოლოდ ქართველებს მიუვიდათ ეს მესიჯები). აქ მცხოვრებ ქართველებს ერთადერთი განცდა დაგვეუფლა, რომ ოკუპანტს დითირამბები არ უნდა უმღერო. თუმცა აქ მცხოვრებ ბევრ ქართველს ასეთი ნიუანსები საერთოდ აღარ აინტერესებს, ეგ კი არა, ერთმანეთი აღარ აინტერესებთ. თუ შემთხვევით გაიგეს, რომ ქართველი ხარ, ცდილობენ მოგერიდონ და შენთან არავითარი კავშირი არ იქონიონ.

- ქართველობის გამო ჩაგვრა თუ გიგრძვნია?

- პირადად მე არა და არც ჩემს ახლობლებს, თუმცა აქ ისეთი სიტუაციაა, რომ ვინც რუსია თვლის, რომ მას ყველაფრის უფლება აქვს, რადგანაც ის რუსია. სხვათა შორის, აგრესიის გამოხატვას ქართველებთან უფრო ერიდებიან, ვიდრე სხვა ეროვნების წარმომადგენლებთან, რადგან იციან, რომ ქართველები პასუხს დაუბრუნებენ და ცოტა მშიშარა ტიპები არიან. 

ლადო გოგოლაძე

AMBEBI.BE

"ჯერ ჩემი შესაძლებლობების მინიმუმიც არ გამომივლენია" - როგორ მოხვდა მეგობრის საგულშემატკივროდ მისული ნიკა შუბითიძე "მხოლოდ ქართულში"

"ოჯახში საახალწლო ფუსფუსი იყო... 12 საათისკენ დამირეკეს, ძებნის ოპერაციაში დახმარება გვჭირდებაო" - პროფესიები, რომლებიც დღესასწაულს არ ცნობს

"ყველას გაუკვირდა, შენ ამას როგორ თამაშობო?" - ვინ არის "ინტრიგანი ჟურნალისტი" ჩცდ-დან და როგორია მისი რეალური ცხოვრება