"პანორამა თბილისი" თუ იუნესკოს სიაში მოხვედრის შანსი - პროექტი, რომელიც საზოგადოების დაპირისპირების მიზეზი გახდა

ბოლო დროს აქტუალური გახდა საქართველოს თანაინვესტირების პროექტი "პანორამა თბილისი", რომლის განხორციელებაც ქალაქის ისტორიულ ნაწილში - სოლოლაკის ქედზე, თავისუფლებისა და ერეკლეს მოედნების ტერიტორიაზე იგეგმება.

მშენებლობა ჯერ არ დაწყებულა, თუმცა პროექტის ირგვლივ ვნებათაღელვა არ წყდება. არასამთავრობო ორგანიზაციები და მწვანე მოძრაობები კატეგორიულად ეწინააღმდეგებიან ძველი თბილისის ისტორიულად მნიშვნელოვან ტერიტორიაზე დაგეგმილ მშენებლობას და ქალაქის იერსახის დაცვას ცდილობენ.

"პარტიზანული მებაღეობა თბილისში" ერთ-ერთი ორგანიზაციაა მათ შორის, ვისთვისაც მიუღებელია პროექტის არსებული შინაარსი. როგორც ორგანიზაციის ხელმძღვანელმა, ნატა ფერაძემ Ambebi.ge-სთან საუბრისას აღნიშნა, "პანორამა თბილისის" განხორციელებით ვკარგავთ უნიკალურ შანსს, რომ ძველი თბილისი იუნესკოს დაცული ძეგლების სიაში მოხვდეს:

"ახალი წლის წინა დღეებში მერიამ საკრებულოს გაუგზავნა რეკომენდაცია მთაწმინდის ქედისთვის ლანდშაფტური სტატუსის მოხსნის შესახებ. შემთხვევით, შუა სხდომიდან დაგვირეკა ალეკო ელისაშვილმა და გაგვაგებინა, რომ ამ საკითხის განხილვა იწყებოდა. მიუხედავად იმისა, რომ საზოგადოებრივი ინტერესი მაღალია, მათ არ ისურვეს, რომ საკითხის განხილვა საჯარო ყოფილიყო. კიდევ ერთ საგულისხმო ფაქტს გეტყვით - ამ პროექტს მიანიჭეს მე-5 კლასის მშენებლობის სტატუსი, რაც უტოლდება ისეთი სტრატეგიული ობიექტების მშენებლობას, როგორიცაა, მაგალითად აეროპორტი. ეს გააკეთეს ახალი წლის წინა პერიოდში, 29 დეკემბერს, რომ ნაკლებად მიექციათ ხალხის ყურადღება. თბილისის ძირითადი ფასეულობა მისი ბუნებრივი ლანდშაფტისა და განაშენიანების ურთიერთმიმართებაა, პროექტი კი სწორედ ამ ავთენტურობის საწინააღმდეგოა,"- აღნიშნა ნატა ფერაძემ.

ნატა ფერაძის თქმით, ქალაქისთვის არსებული იერსახის შენარჩუნების გარდა, არანაკლებ მნიშვნელოვანია სატრანსპორტო და გარემოსდაცვითი თვალსაზრისით არსებული რისკები:

"არსებობს რეალური შანსი, რომ გადაიტვირთოს სამივე სალოკაციო ტერიტორიასთან მისასვლელი გზები, რაც დისკომფორტს შეუქმნის როგორც ისტორიულ ზონაში მცხოვრებ და ზოგადად ქალაქის დანარჩენ მოსახლეობას, ასევე თბილისის სტუმრებს. გასათვალისწინებელია ისიც, რომ სატრანსპორტო ნაკადების ზრდით გამოწვეული გამონაბოლქვი დაამძიმებს ისედაც რთულ ეკოლოგიურ მდგომარეობას, რაც დამატებით საფრთხეს შეუქმნის მოსახლეობის ჯანმრთელობას.

გარემოსდაცვითი თვალსაზრისით დაუშვებელია სოლოლაკის ქედის, როგორც ლანდშაფტური ტერიტორიის ხელყოფა. ასევე, ბეტონის მოცულობებში დარგული ნერგები ვერ შეცვლის იმ ეკოსისტემას, რომლის გაჩეხვაც გათვალისწინებულია პროექტის მიხედვით", - აღნიშნა "პარტიზანული მოძრაობის" დამფუძნებელმა ნატა ფერაძემ.

Ambebi.ge "თანაინვესტირების ფონდის" ხელთ არსებული ისტორიულ-არქიტექტურული და გარემოსდაცვითი კვლევის დასკვნებითა და რეკომენდაციებით დაინტერესდა. შპს "გამა კონსალტინგის" დასკვნაში ვკითხულობთ, რომ "პროექტის მიხედვით გათვალისწინებულია ტერასული ტიპის საცხოვრებელი განაშენიანების მოწყობა, რომელიც მაქსიმალურად იქნება შეხამებული ადგილობრივ ლანდშაფტთან. აღსანიშნავია ის ფაქტი, რომ საპროექტო ტერიტორია დღევანდელი მდგომარეობით მაღალი ვიზუალურ-ლანდშაფტური ღირებულებით არ გამოირჩევა, რაც მნიშვნელოვნად გაუმჯობესდება პროექტის განხორციელების შემთხვევაში.

დასკვნებისა და რეკომენდაციების დოკუმენტში არსებობს გარემოზე ზემოქმედების შეფასების ნაწილიც, სადაც აღნიშნულია, რომ ჩატარებული კვლევის შედეგების მიხედვით, მცენარეულ საფარზე ნეგატიური ზემოქმედების რისკი მინიმალურია. პროექტის მიხედვით კი დაგეგმილია "დიდი მოცულობის გამწვანების სამუშაოების შესრულება, რაც ხელს შეუწყობს ახალი განაშენიანების ადგილობრივ ლანდშაფტთან შეხამებას".

პროექტის მოწინააღმდეგე მხარეები კი აღნიშნავენ, რომ გარემოსდაცვითი თვალსაზრისით დაუშვებელია სოლოლაკის ქედის, როგორც ლანდშაფტური ტერიტორიის ხელყოფა. ბეტონის მოცულობებში დარგული ხეები ვერ იქნება იმ ეკოსისტემის შემცველი, რომლის გაჩეხვაც პროექტის მიხედვით არის გათვალისწინებული.

"პანორამა თბილისის" გარემოსდაცვითი კვლევის შესაბამის ნაწილში აღნიშნულია, რომ სამშენებლო სამუშაოების მიმდინარეობის პროცესში შესაძლებელია განადგურდეს 128 ხე-მცენარე, რომელთაგან ყველა ელდარის ფიჭვია.

"თანაინვესტირების ფონდის" ერთ-ერთი არგუმენტი პროექტის განხორციელების მნიშვნელობასთან დაკავშირებით სამუშაო ადგილების შექმნა, ადგილობრივი მუშა-ხელის დასაქმებაა, რასაც ოპონენტი მხარე განსხვავებულ არგუმენტს უპირისპირებს:

"არგუმენტი, რომ მისი განხორციელების შემთხვევაში, დასაქმდება რამდენიმე ათასი ადამიანი, ვერ ჩაითვლება მყარ საფუძვლად, ვინაიდან პროექტის სხვა ადგილას განხორციელების შემთხვევაშიც შესაძლებელია სამუშაო ადგილების გაჩენა. უფრო მეტიც, პროექტის ისტორიული ქალაქის მიღმა განხორციელება შექმნის ახალი მიზიდულობის ცენტრს, სადაც შესაძლებელი იქნება როგორც აღნიშნული პროექტის განვითარება და გაფართოება, ასევე ახალი ინვესტიციების მოზიდვა."

31 იანვარს 15 საათზე 20-მდე არასამთავრობო და სამოქალაქო მოძრაობა ერთიანდება პროექტ "პანორამა თბილისის" წინააღმდეგ და მართავენ აქციას სახელწოდებით "არა პანორამას". "ეს ჩვენი ქალაქია და მის ბედს ჩვენ უნდა განვაგებდეთ"- აღნიშნავენ ისინი და მოსახლეობას თანადგომისკენ მოუწოდებენ.

სალომე შიხაშვილი

AMBEBI.GE

იხილეთ ვიდეო: როგორ შეცვლის თბილისს "პანორამა თბილისი"