ფსიქოლოგის ინსტიტუტი საქართველოში: რატომ უნდა მივმართოთ ფსიქოლოგს და რა შედეგი შეიძლება მოგვიტანოს სეანსებმა

ფსიქოლოგის ინსტიტუტი საქართველოში: რატომ უნდა მივმართოთ ფსიქოლოგს და რა შედეგი შეიძლება მოგვიტანოს სეანსებმა

საქართველოში ფსიქოლოგის ინსტიტუტთან დამოკიდებულება არაერთგვაროვანია. უმეტესობა ფიქრობს, რომ ფსიქოლოგი მხოლოდ პრობლემების დროს გვჭირდება და მათ დასახმარებლად მხოლოდ უკიდურეს მომენტში მიმართავს, თუმცა როგორც Ambebi.ge-სთან თავად ფსიქოლოგები ამბობენ, ფსიქოლოგთან კონსულტაცია ადამიანს სულიერ განვითარებაში, აზრის, ემოციის კონტროლში ეხმარება.

ფსიქოლოგ ნათია ფანჯიკიძის თქმით, წინა წლებთან შედარებით, ბოლო პერიოდში ადამიანები ფსიქოლოგის ინსტიტუტს უნდობლად არ უყურებენ და დახმარებისთვის ხშირად მიმართავენ.

- ზოგს ჰგონია, რომ რაღაც პრობლემის გადასაჭრელად მეგობრის ინსტიტუტი საკმარისია, ზოგს ჰგონია, რომ მოძღვართან აღსარების თქმა და ფსიქოლოგთან ვიზიტი ერთი და იგივეა, მაგრამ უკვე დაიწყეს იმის გარჩევა, რომ ფსიქოლოგი არის ფსიქოლოგი, მეგობარს რა თქმა უნდა, სულ სხვა ფუნქცია აქვს, მაგრამ მეგობარს არ შეუძლია მოხსნას სერიოზული პრობლემა, აქედან გამომდინარე, დეპრესია თუ გამწვავდა, ის უკვე სერიოზული დაავადებაა და მხოლოდ უხასიათო ცხოვრებას და ცხოვრებაში მცირე პრობლემის ქონას არ ნიშნავს.

- ბევრი ზუსტად ამას ამბობს, რომ რა საჭიროა ფსიქოლოგი, რაში გვეხმარებაო...

- პაციენტი, რომელიც ეკუთვნის ფსიქიატრიას, ფსიქოლოგიას, სიტყვების ეშინია და მიდის ნევროპათოლოგთან, სიტყვა ნერვები მისთვის უფრო უსაფრთხოა და ასე იმიტომ იქცევა. სინამდვილეში, ნევროპათოლოგს ტვინის ორგანული პრობლემები ეკუთვნის, ეს არის მაგალითად ეპილეფსია, პარკინსონი, ცერებრალური დამბლა და ა.შ. რაც შეეხება ტვინის პროცესს –აზრს, ემოციას, ფიქრს, ეს ფსიქიატრიას და ფსიქოლოგიას ეკუთვნის, ასე რომ, ამაში საშიში არაფერია და ფსიქოლოგთან ვიზიტი სულაც არ ნიშნავს სიგიჟეს. ზოგადად, ეს სიტყვა საერთოდ არ მიყვარს, ძალიან არასწორია. ფსიქოლოგთან ვიზიტი სულაც არ ნიშნავს იმას, რომ შენ რაღაც პრობლემა გაქვს და თუნდაც ადამიანს ჰქონდეს პრობლემა, ეს ადამიანი, რომელიც პრობლემას აღიქვამს და მის მოგვარებას ცდილობს, არაფრით არ შეიძლება ჩაითვალოს უკრიტიკო და ისეთ ადამიანად, რომლისთვისაც თავის მოვლა უხერხულია.

- ფსიქოლოგთან გარკვეული კურსის გავლის შემდეგ შედეგი როგორია?

- დღეს ფსიქიატრიაში მედიკამენტები ძალიან დახვეწილია, მიზანს მაქსიმალურად აღწევს და გვერდითი მოვლენები მაქსიმალურად შემცირებულია. ფსიქოთერაპიის არსი არის ის, რომ შენ როგორი წამალიც არ უნდა დალიო, შენი ცხოვრების რეალობის აღქმას წამალი ვერ შველის. წამალი სიმპტომებს მოხსნის, ტკივილს გააყუჩებს, ხოლო ფსიქოთერაპია ეს არის ფესვიდან გადასხვაფერება, სამყაროს ხედვა, დამოკიდებულების შეცვლა გარკვეული საკითხების მიმართ; საკუთარი დაავადების მართვა, თუკი ასეთი დაავადება არსებობს.  აქედან გამომდინარე, ყოველი ასეთი მკურნალობა ძალიან შედეგიანია. ხოლო ხანგრძლივობა, ვიზიტის რაოდნეობა, უკვე პრობლემის სიმძიმეზეა დამოკიდებული. თავად ფსიქოლოგთან ვიზიტი გულისხმობს საუბრის პროცესს, რომელიც თავისი წესებით წარიმართება, უბრალოდ, ფსიქოლოგი რაც უფრო გამოცდილი და პროფესიონალია, საუბარი მით უფრო წააგავს საუბარს, ვიდრე რაღაც სავარჯიშოებს.

საქართველოში ინდივიდუალურ თერაპიას უფრო ირჩევენ, ვიდრე ჯგუფურს. ჯგუფურ თერაპიაში მონაწილეობა ხალხს ნაკლებად უყვარს, მაგრამ ამ დროს გულახდილობა სულ არ არის მოთხოვნა. პირდაპირი გზით ადამიანები თავის ამბავს არ ჰყვებიან, ეს არის სპეციალურად დამუშავებული ტექნიკა, რითიც სიმბოლურ ენაზე განკურნება ხდება, თუმცა ზოგჯერ არის, რომ ადამიანს მხოლოდ ინდივიდუალური თერაპიის მიღება ურჩევნია. ხალხს ვეტყვი, რომ ფსიქოლოგთან მისვლის არ უნდა ეშინოდეთ, ეს მხოლოდ მცირედ დახმარებას არ გულისხმობს და თერაპია მართლა შედეგიანია. მთავარია ადამიანს უნდოდეს განკურნება, მოუაროს თავის თავს და მერე უკვე სხვა დანარჩენი პრობლემად არ მესახება.

ფსიქოლოგ მარინა კაჭარავას თქმით, ადამიანების ნაწილს დღესაც ერთმანეთში ერევათ ფსიქოლოგი და ფსიქიატრი:

"ფსიქოლოგთან მომართვიანობა მაინც გაზრდილია. რამდენიმე ჯგუფში ვმუშაობ, სადაც არიან ნარკომომხმარებლები, მოთამაშეეები, კაზინოდამოკიდებულები, ვმუშაობ მოზარდებთან, რომელთაც აქვთ კომუნიკაციის პრობლემა, დამოკიდებულები არიან ტელეფონზე და კომპიუტერზე, მშობლების გაყრის გამო გაჩენილი პრობლემა და ა.შ.

ზოგადად, ფსიქოლოგი სარკეს ჰგავს, რომელშიც იხედები და პრობლემას ხედავ. სარკე გეუბნება, როგორ გაიკეთო თმა, სახეზე რა წაისვა... ფსიქოლოგის ფუნქციაც ეს არის, რომ ადამიანი პრობლემაში ჩაახედოს და ადამიანმა გადაწყვეტილება თავად მიიღოს, არჩევანი გააკეთოს და ხშირ შემთხვევაში სამყაროსადმი დამოკიდებულება შეიცვალოს. რაც მთავარია, ეს ყველაფერი თავად უნდა მოინდომოს", - ამბობს მარინა კაჭარავა.

მისივე თქმით, დასავლეთის ქვეყნებში ფსიქოლოგს ინსტიტუტი ადამიანების ყოველდღიურ ცხოვრებაში დიდ ნაწილს იკავებს და ეს სულაც არ არის ცუდი:

"ჩვენთან იმდენად დიდია ურთიერთობების როლი, სუფრის როლი, კომუნიკაცია, მეგობრობა, რომ ხშირ შემთხვევაში ფსიქოლოგს "ენაცვლება". რა თქმა უნდა, ფსიქოლოგი მეგობარს და ახლობელს ვერ ჩაენაცვლება, მაგრამ ფსიქოლოგსა და პაციენტს შორის ურთიერთობა ძალიან თერაპიულია, დასავლეთში ფსიქოლოგთან კონსულტაცია, როგორც წესი, რეკომენდაციაა.

ჩვენთან ძალიან თერაპიულია სუფრა, თუ, რა თქმა უნდა, ის სავსეა სიმღერით, ლექსებით, სასიამოვნო საუბრებით, სადაც გამოხატულია ურთიერთპატივისცემა, ამიტომ ამ მხრივ ბევრი პლიუსი გვაქვს, მაგრამ პროფესიონალის დახმარება დღეს უკვე ძალიან ბევრს სჭირდება. ხშირ შემთხვევაში შეიძლება პრობლემა გამოკვეთილი არ იყოს, მაგრამ პიროვნული ზრდისთვის, საკუთარი თავის შეცნობისთვის, ემოციის მართვისთვის, ფსიქოლოგთან ურთიერთობა ძალიან მნიშვნელოვანია.

თაკო ესებუა

AMBEBI.GE

ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"

უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"

ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია