გუშინ მიხეილ მესხის სახელობის სტადიონზე "თბილისი 2015"-ის გახსნისადმი მიძღვნილი საზეიმო ღონისძიება გაიმართა. ცერემონია თითქმის ორ საათს გაგრძელდა. ის დატვირთული იყო გრანდიოზული შოუთი, რომელიც ქართველმა რეჟისორებმა დადგეს. წარმოდგენილი იყო არგონავტების ექსპოზიცია და ამ დადგმაში მონაწილეობა მიიღო მსოფლიოში სახელგანთქმულმა ბალერინამ ირმა ნიორაძემ. ასევე, შესრულდა ქართული ფოლკლორული საცეკვაო ნომრები. მათ შორის ხორუმი, სამაია. წარმოდგენილი იყო ქართული საგალობლები.
ღონისძიების ბოლოს ოლიმპიური ცეცხლი სტადიონზე საჰაერო ბურთით შემოიტანა აკრობატმა გოგონამ, რომელმაც ცეცხლი გადასცა ყოფილ ფეხბურთელ გელა კეტაშვილს. სტადიონზე ოლიმპიური ცეცხლის ესტაფეტაში გელა კეტაშვილის გარდა მონაწილეობა მიიღეს პარაოლიმპიელმა თემურ დადიანმა, ტყვიის მსროლელმა ნინო სალუქვაძემ. ხოლო მთავარი ოლიმპიური ჩირაღდანი აანთო დამოუკიდებელი საქართველოს ისტორიაში პირველმა ოლიმპიურმა ჩემპიონმა, ზურაბ ზვიადაურმა.
საზეიმო ღონისძიებაზე საკუთარი ქვეყნები წარმოადგინეს მედროშეებმა. მიხეილ მესხის სტადიონზე შეკრებილ საზოგადოებას სიტყვით მიმართეს საორგანიზაციო კომიტეტის თავმჯდომარემ ალექსი ახვლედიანმა, ევროპის ოლიმპიური კომიტეტის პრეზიდენტმა პატრიკ ჰიკიმ და პრემიერ-მინისტრმა ირაკლი ღარიბაშვილმა, რომელმაც ოლიმპიური ფესტივალი გახსნილად გამოაცხადა.
ოლიმპიურ ფესტივალში, რომელიც პირველ აგვისტომდე გაგრძელდება, 50 ევროპული ქვეყანა მონაწილეობს.
იხილეთ ვიდეოები: ევროპის ახალგაზრდული ფესტივალის გახსნის კულმინაცია
ირმა ნიორაძემ ევროპის ახალგაზრდული ფესტივალის გახსნაზე მედეა განასახიერა
შთამბეჭდავი სანახაობა ევროპის ახალგაზრდული ფესტივალის გახსნაზე - "სუხიშვილების" სამაია რამდენიმე მეტრის სიმაღლეზე
ყველაზე მასშტაბური ხორუმი ევროპის ახალგაზრდული ფესტივალის გახსნაზე