დღეიდან მარიამობის მარხვა დაიწყო - ყველაფერი, რაც უნდა იცოდნენ მორწმუნეებმა ამ პერიოდის შესახებ

დღეიდან მარიამობის მარხვა დაიწყო, ის ორკვირიანია და 28 აგვისტოს ღვთისმშობლის მიძინების დღეს - "მარიამობას" დასრულდება.

მარიამობის მარხვის მნიშვნელობაზე და იმაზე, თუ როგორ უნდა დავიცვათ მარხვა, AMBEBI.GE-ს ნარიყალას წმ. ნიკოლოზის ტაძრის წინამძღვარი, დეკანოზი გიორგი თევდორაშვილი ესაუბრება.

- საეკლესიო სწავლებით წელიწადში დადგენილია ოთხი მარხვა, - მარიამობის, შობის, აღდგომისა და პეტრე-პავლობის. ყველა მარხვის შინაარსი ერთი და იგივეა, მაგრამ ხანგრძლივობით და ისტორიით სხვადასხვა.

მარხვებს შორის უპირატესი დიდი, ანუ აღდგომისა და შობის მარხვაა. ვინმემ შეიძლება გაიკვირვოს, მიძინება ხომ იგივე გარდაცვალებაა და როგორ შეიძლება შენი საყვარელი ადამიანის გარდაცვალება იდღესასწაულო? ეკლესიური სწავლებით წმინდანი, რომელიც გარდაიცვლება, ანუ მიიძინებს, უფრო ახლოს მიდის ღმერთთან და მას უფრო მეტი დახმარების გაწევა შეუძლია ჩვენთვის.

საეკლესიო გადმოცემით, ქმნილებათა შორის, მხოლოდ ღვთისმშობელი ბრძანდება დღეს სასუფეველში სხეულებრივად. როცა ადამიანი გარდაიცვლება, სული გაეყრება ხორცს, სასუფეველში მარტო წმინდანთა სულები არიან, აღდგომას მათი სულები ისევ ხორცს შეუერთდება, მაგრამ ღვთისმშობელი ერთადერთი ქმნილებაა, რომელიც სულით და ხორცით არის სასუფეველში.

ამას გარდა, ღვთისმშობელი იერარქიულად ყველაზე მაღლა დგას. არსებობს ლოცვა "ღირს არს", რომელიც ასე გამოითქმის - "უპატიოსნესსა ქერუბიმთასა და აღმატებით უზესთაესა სერბიმთასა" ანუ საეკლესიო სწავლებით, სანამ ღვთისმშობელი სასუფეველში ამაღლდებოდა, მანამდე წმინდა სამების შემდეგ იერარქიულად იყვნენ სერაბიმ-ქერუბიმები, ღმერთმა კი მათზე მაღლა ღვთისმშობელი დააყენა, ეს ძალიან დიდი წყალობაა.

- რატომ აღინიშნება მარიამობა 28 აგვისტოს?

- საეკლესიო ახალი წელი 14 სექტემბერს არის, ხოლო 21-ში ღვთისმშობლის შობაა, ანუ საეკლესიო დღესასწაული ღვთისმშობლის შობით იწყება, საეკლესიო წელიწადი კი ღვთისმშობლის მიძინებით სრულდება, ეს საეკლესიოა მამების მიერაა დადგენილი. ამ დღეს მიიცვალა ღვთისმშობელი. მისი მიძინებით მთავრდება საეკლესიო წელიწადი და ღვთისმშობლის შობით იწყება ახალი საეკლესიო წელიწადი.

- როგორ უნდა მოიქცეს მართლმადიდებელი ქრისტიანი მარხვის პერიოდში?

- ღმერთმა მარხვა იმიტომ დაადგინა, რომ ადამიანი სულიერად და ხორციელად განიწმინდოს და იმ განწყობით შეხვდეს დღესასწაულს, რა განწყობაც ეკადრება წმინდანის ან საუფლო დღესასწაულის აღნიშვნას. ერთხელ მამა გაბრიელ ურგებაძეს ერთმა ახალგაზრდა ბერმა ჰკითხა, მამაო რა არის მარხვაო, მამა გაბრიელმა კი მას თავისი სიჭაბუკის ცოდვები გაახსენა. როცა შეატყო რომ ბერი დანაღვლიანდა და გაბრაზდა, უთხრა, ნუ ბრაზობ, მოდი პური ვჭამოთო, ბერმა კი უთხრა, პურის ჭამის სურვილი არ მაქვსო. ზუსტად ეს არის მარხვაო, რომ შენი ცოდვებიდან გამომდინარე, მოლხენის სურვილი აღარ გაქვსო.

მარხვაში სხეულს გარკვეული აკრძალვა უნდა დაუწესო იმიტომ, რომ მარხვაში თუ გემრიელად მიირთმევ სამარხო კერძებს, ვერ გაიაზრებ დღესასწაულის შინაარსს. უნდა მოვიკლოთ გარკვეული საკვები, სანახაობა, უნდა ვამარხულოთ თვალები სანახაობისგან, სმენა გარკვეული უხამსი მოსასმენისგან, ხელები და ფეხები გარკვეული უაზრო ქმედებისგან.

წარმოუდგენელია ადამიანი მარხვაზე იყოს და ერთობოდეს, შოუებს უყურებდეს, არ კითხულობდეს სახარებას, არ ლოცულობდეს, აღსარებას არ ამბობდეს, არ ეზიარებოდეს და ეკლესიაში არ დადიოდეს.

მარხვაში ხორცს და რძის ნაწარმს არ მივირთმევთ, იოანე ოქროპირი კი გვასწავლის, რომ თანხა, რითიც ეს პროდუქტები უნდა გვეყიდა, შეგვიძლია მოწყალების სახით დავურიგოთ გაჭირვებულებს. ლოცვა, აღსარება, ზიარება, ქველმოქმედება, სიკეთე... წარმოუდგენელია ადამიანი მარხვას ინახავდეს და მოწყალებას არ გასცემდეს, სულიერად არ ცხოვრობდეს.

აქვე მინდა დავძინო, რომ ამ პერიოდში ადამიანები დასასვენებლად არიან წასულები ზღვაზე, მთაში, სოფელში და ა.შ. ამ დროს ბევრი ამბობს, რომ მარხვის შენახვა ვერ მოვახერხეო. ასე არ შეიძლება, თუ მართმადიდებელი ქრისტიანი ხარ, ყველა დადგენილი მარხვა უნდა შეინახო დიდი მონდომებითა და სიყვარულით. შეიძლება სხეულმა დაისვენოს, მაგრამ სული ამ დროს არ ისვენებს, სულს ყოველთვის სჭირდება ლოცვა, მარხვა, აღსარება და ზიარება.

თაკო ესებუა

AMBEBI.GE