გარევაჭრობა თბილისსა და ევროპაში: რით განსხვავდება თბილისელ გაჭირვებულთა ბრძოლა გადარჩენისთვის ევროპული სტანდარტებისგან

გარევაჭრობა თბილისსა და ევროპაში: რით განსხვავდება თბილისელ გაჭირვებულთა ბრძოლა გადარჩენისთვის ევროპული სტანდარტებისგან

მიუხედავად იმისა, რომ საქართველოში გარევაჭრობა კანონით აკრძალულია, გარემოვაჭრეებს არა მხოლოდ ბაზრების მიმდებარე ტერიტორიაზე შეხვდებით, არამედ თბილისის ცენტრალურ უბნებშიც. თუმცა, რამდენიმე დღეა დედაქალაქის მერიამ გარემოვაჭრეებს საქმიანობა აუკრძალა. ამ აკრძალვის რეალურად განხორციელება მარჯანიშვილის მეტროს მიმდებარე ტერიტორიიდან დაიწყო.

დედაქალაქის მთავრობის მიერ ჩატარებული მოლაპარაკებების შედეგად გადაწყდა, რომ ბაზრობების ასოციაცია, შეღავათიანი პირობებით, 6 თვის ვადით, გარემოვაჭრეებს სამეწარმეო საქმიანობის განხორციელების მიზნით ადგილებს დაუთმობს და ბაზრობების დირექცია მეწარმეებს საკუთარი პროდუქციის კონკურენტუნარიან პირობებში რეალიზაციისთვის ყველა პირობას შეუქმნის.

გარემოვაჭრეებს საკუთარი პროდუქციის რეალიზაცია რკინიგზის სადგურსა და მის მიმდებარე ტერიტორიაზე, დინამოს მიმდებარე ტერიტორიაზე, მეტრო-სადგურ დიდუბის მიმდებარე ტერიტორიაზე, ძველი დეზერტირების ბაზრის ადგილას აშენებული ახალი ბაზრის ტერიტორიასა და ისნისა და სამგორის ბაზრობებზე შეუძლიათ.

თბილისის თვითმმართველი ერთეულის ტერიტორიაზე გარე ვაჭრობა შესაბამისი ნებართვის გარეშე - იწვევს ფიზიკური ან/და იურიდიული პირის დაჯარიმებას 20 ლარით. გარე ვაჭრობის პირველი შემთხვევა ითვალისწინებს დაჯარიმებას 20 ლარის ოდენობით და საქონლის კონფისკაციას. ხოლო იგივე ქმედების ჩადენა განმეორებით, გამოიწვევს სამართალდამრღვევის 100 ლარით დაჯარიმებას და საქონლის კონფისკაციას.

მომხმარებელთა ფედერაციის თავმჯდომარის, მადონა კოიძის თქმით, თბილისში გარევაჭრობა კანონით აკრძალულია, თუმცა ევროპის ზოგიერთ ქალაქში ნაწილობრივ დაშვებულია, თუ მოვაჭრეები შესაბამის პირობებს შეასრულებენ.

"ევროპის ქალაქებში გარევაჭრობა ნაწილობრივ დაშვებულია, როდესაც ე.წ. ბაზრობის დღეები იმართება. თუმცა, შესაბამისი სტანდარტული ნორმები, რაც პროდუქტის რეალიზაციისთვის საჭიროა, დაცული უნდა იყოს. მაგალითად, თუ პროდუქტი მალფუჭებადია, უნდა იდოს სამაცივრო დანადგარებში და მოსახლეობის ჯანმრთელობა საფრთხის წინაშე არ უნდა დადგეს.

რაც შეეხება საქართველოს, ნებისმიერი მომხმარებლისთვის ცნობილია, რომ პირდაპირ ქუჩაში იყიდება რძის ნაწარმი, ხორცის ნაწარმი და თვითონ ნედლი ხორცი, რაც ყოვლად დაუშვებელია, ვინაიდან ეს პროდუქტი განსაკუთრებულად მალფუჭებადად ითვლება. ყოვლად დაუშვებელია მალფუჭებადი პროდუქტები იყიდებოდეს ქუჩაში, მით უმეტეს მაშინ, როდესაც საქართველოში არსებობს კანონი, რომლის მიხედვით, გარევაჭრობა არის აკრძალული და შესაბამისად, მასზე ჯარიმებია გათვალისწინებული", - ამბობს მადონა კოიძე.

მისივე თქმით, გაეროს რეზოლუციის თანახმად, რომელიც მომხმარებელთა უფლებების დაცვას ეხება, ჩამოყალიბებულია პრინციპი, რომ მომხმარებელს აქვს უფლება იცხოვროს ჯანსაღ გარემოში.

"რომელ ჯანსაღ გარემოზეა საუბარი, როდესაც გარევაჭრობის მიმდებარე ტერიტორიაზე მაცხოვრებელ მოსახლეობას ელემენტარული არსებობის პირობები აქვს წართმეული. მათ არ შეუძლიათ გაანიავონ თავიანთი საცხოვრებელი სახლები, არ შეუძლიათ თავისუფლად მოხვდნენ ოჯახებში, ვინაიდან სადარბაზოები გადაქცეულია საპირფარეშოებად. დროა ხელისუფლებამ ამ პრობლემას გლობალურად მიხედოს. თუმცა აქ მეორე საკითხია პრობლემატური, გარემოვაჭრის ბედი, რომელიც ბაზარში დიდი გადასახადის გამო არ შედის", - ამბობს მადონა კოიძე.

AMBEBI.GE ევროპის იმ ქალაქებით დაინტერესდა, სადაც თბილისის მსგავსად, გარევაჭრობის ფაქტებს შეხვდებით:

კაუპატორი, ჰელსინკი

ფინეთის ყველაზე ცნობილი ქუჩის ბაზარი პორტთან სიახლოვეს მდებარეობს. ბაზრის თავზე ძალიან ბევრი თოლია დაფრინავს. ბაზარში გასტრონომიული პროდუქტები იყიდება - ახალი თევზი, კარტოფილი, ირმის ხორცი და ა.შ. ამასთან, ბაზარში უკვე მზა საკვებიც იყიდება, რომელიც შეგიძლიათ ადგილზევე დააგემოვნოთ.

ბრიტოლ ითსი, ბრისტოლი

ბრისტოლ ითსი ერთ-ერთი ყველაზე სახელგანთქმული გარე სავაჭრო წერტილია ბრიტანეთში. აქ ღია ცის ქვეშ იყიდება უგემრიელესი დონატები, ვეგეტარიანული კერძები. საფირმო ლაიმის ნამცხვრები და ა.შ. ბრისტონ ითსი გამყიდველთა დიდი კოლექტივისგან შედგება.

ლე მარშ რასპალი, პარიზი

ეს გახლავთ გარე ვაჭრობის ის შემთხვევა, სადაც შეიძლება ცნობილ ადამიანებს გადაეყარო. ლე მარშ რასპალი პარიზის ყველაზე დიდებული საკვები პროდუქტების შოპინგის გამოცდილებას იძლევა. ორშაბათობით ამ ბაზარში ორგანული ან ბიო პროდუქცია იყიდება.

პარალელურად ევროპაში ძალიან პოპულარულია "ფლი მარკეტის" სისტემა, რაც ღია ცის ქვეშ ყიდვა-გაყიდვის პროცედურას გულისხმობს. აღსანიშნავია, რომ "ფლი მარკეტის" კულტურა უკვე თბილისშიც დაინერგა.

როგორც წესი, ასეთ გარე ბაზრობებზე იყიდება ყველანაირი პროდუქტი - დაწყებული ტანსაცმლით, დამთავრებული კულინარიული კერძებით. მოგზაურთათვის სპეციალური გზამკვლევებიცაა შექმნილი, რომელშიც აღნიშნულია ევროპაში მოგზაურობისას, რომელი "ფლი მარკეტი" უნდა მოინახულოთ.

პორტობელოს გზის ბაზრობა

აქ მხოლოდ ანტიკვარული ნივთები იყიდება. ათასამდე გამყიდველს გამოაქვს დიდებული ანტიკვარები და საკოლექციო ნივთები, ხოლო დამთვალიერებელს შეუძლია დატკბეს მათი დეკორატიული სილამაზით ან სურვილისამებრ შეიძინოს. ერთი სიტყვით, ეს მშრალი ხიდის ბრიტანულ ვერსიად შეგვიძლია მივიჩნიოთ.

ფეირა და ლადრა

პირდაპირი თარგმანით ლისაბონის ეს "ფლი მარკეტი" "ქურდების ბაზრობა" გახლავთ. ბაზრობა რამდენიმე ქუჩაზეა განლაგებული. ის შუასაუკუნეებიდან არსებობს და ცნობილი იყო, როგორც მოპარული ნივთების გასასაღებელი ტერიტორია, აქედან მიიღო მან დღევანდელი სახელიც. დღეისათვის ეს ბაზრობა ძალიან რესპექტაბელურ ადგილად ითვლება და ხარისხიანი პროდუქციის დაბალ ფასებში შეძენის საშუალებას იძლევა.

მილანის "ფლი მარკეტი"

მილანის "ფლი მარკეტი" ერთ-ერთი საუკეთესოა ევროპაში. იქ უნიკალური ატმოსფერო სუფევს. ბაზრობაზე შეგხვდებათ ძველებური ავეჯი, საოცარი სამკაულები, ელეგანტური ტანსაცმელი და უამრავი საყოფაცხოვრებო ნივთები.

თაკო ესებუა, ბაჩო ოდიშარია

AMBEBI.GE

ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"

უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"

ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია