სახელმწიფო უსაფრთხოების სამსახურმა "ისლამურ სახელმწიფოსთან" შესაძლო კავშირის ბრალდებით 4 პირი დააკავა. აღნიშნულთან დაკავშირებით სუს-ში სპეციალური ბრიფინგი გაიმართა. როგორც ლევან იზორიამ ბრიფინგზე განაცხადა, 11 საცხოვრებელი სახლის ჩხრეკის შედეგად, "ოთხი პირის საცხოვრებელი სახლებიდან ხელყუმბარები, ცეცხლსასროლი იარაღები, საბრძოლო ვაზნები,სხვადასხვა ლიტერატურა და "ისლამური სახელმწიფოს" მიკუთვნებული დროშები" ამოიღეს. ერთ-ერთი იყო ხვიჩა გაბოძის სახლი, რომელიც ISIS-ის სახელით გავრცელებული ვიდეოს ერთ-ერთი ავტორია.
როგორც გაბოძის მეუღლე სალომე ქათამაძე და მისი ოჯახის წევრები აღნიშნავენ, ჩხრეკის დროს სამართალდამცველებმა მათ სახლში "ისლამური სახელმწიფოს" დროშა ჩადეს. სალომე გობაძის თქმით, მეუღლეს ჩხრეკის ჩატარებამდე ერთი დღით ადრე ესაუბრა. მეუღლის თქმით, სირიაში მყოფი ხვიჩა გობაძე ამბობს, რომ "იქ ისეთი სიტუაცია არ არის, როგორც ტელევიზორში ჩანს, ხალხი ლამაზად ცხოვრობს, ქალები, ბავშვები... უზრუნველყოფილები არიან ყველაფრით". ჟურნალისტების კითხვაზე, წავა თუ არა მეუღლესთან შესაძლებლობის შემთხვევაში, სალომე გობაძე ამბობს, რომ არ იცის.