გიორგი მარგველაშვილი შობის დღესასწაულს დუშეთში, წმინდა ნიკოლოზის ეკლესიაში შეხვდა. საქართველოს პრეზიდენტი საშობაო ლიტურგიას პირველ ლედისთან, მაკა ჩიჩუასთან ერთად დაესწრო. ქვეყნის პირველმა პირმა საქართველოს მოსახლეობას ქრისტეშობის დღესასწაული მიულოცა.
პრემიერ-მინისტრი გიორგი კვირიკაშვილი, თბილისის მერთან, დავით ნარმანიასთან და ცენტრალური და ადგილობრივი მთავრობის წარმომადგენლებთან ერთად, საშობაო ლიტურგიას სამების საკათედრო ტაძარში დაესწრო.
საზეიმო ღვთისმსახურება სრულიად საქართველოს კათოლიკოს-პატრიარქმა, ილია II აღავლინა. წირვის დაწყებამდე წაიკითხეს საშობაო ეპისტოლე.
გიორგი კვირიკაშვილმა მართლმადიდებლებს შობის დღესასწაული მიულოცა და მათ ღვთის წყალობა, წარმატება და ბედნიერება უსურვა.