თამბაქოს პროდუქციაზე ფასები უკვე გაიზარდა

თამბაქოს პროდუქციაზე ფასები 28-დან 35 თეთრამდე უკვე გაიზარდა აქციზის განაკვეთის ზრდის გამო თამბაქოს პროდუქციაზე ფასები 28-დან 35 თეთრამდე უკვე გაიზარდა. როგორც ცნობილია, 2016 წლის 1-ელი იანვრიდან საგადასახადო კანონმდებლობაში შეტანილი ცვლილებები ამოქმედდა, რომლის თანახმადაც, თამბაქოს პროდუქციაზე აქციზის განაკვეთი ფიქსირებული 20 თეთრით და ღირებულების 5%-ით გაიზარდა.

უფრო კონკრეტულად კი, აქციზის ზრდა სხვადასხვა ღირებულების სიგარეტზე სხვადასხვანაირად აისახა, კერძოდ, თუ სიგარეტის კოლოფის ღირებულება 1.5 ლარს შეადგენდა, მისთვის აქციზის განაკვეთი 28 თეთრით გაიზარდა, 2 ლარიანი სიგარეტის შემთხვევაში - 30 თეთრით, 2.5 ლარიანი სიგარეტის შემთხვევაში - 33 თეთრით და 3 ლარიანი სიგარეტის შემთხვევაში - 35 თეთრით.

ფინანსთა სამინისტროში განმარტავენ, რომ ზოგიერთი საცალო გაყიდვის პუნქტის მიერ თამბაქოს პროდუქციაზე ფასების მკვეთრი ზრდა, აქციზს არ უკავშირდება.

როგორც სავაჭრო ჯიხურებში აცხადებენ, აქციზის განაკვეთის ზრდა სიგარეტის ღირებულებაზე ახალი წლის პერიოდში უკვე აისახა. ზოგიერთი მაღაზია გარკვეული დასახელების თამბაქოს ნაწარმს ჯერ კიდევ ძველი ფასით ჰყიდის, თუმცა გამყიდველები ფასების მომატებას აღნიშნულ სიგარეტებზეც ელოდებიან.

საქართველოს პარლამენტმა სიგარეტსა და ალკოჰოლურ სასმელებზე აქციზის განაკვეთის გაზრდასთან დაკავშირებული, საგადასახადო კანონმდებლობაში ცვლილებები მესამე მოსმენით 11 დეკემბერს დაამტკიცა. ცვლილებების თანახმად, აქციზის ფიქსირებული განაკვეთი 2016 წლის 1-ელი იანვრიდან გაიზარდა.

აღნიშნული ცვლილებები მთავრობამ თამბაქოს კონტროლის ღონისძიებების გამკაცრებით, ამ მხრივ ევროკავშირის კანონმდებლობასთან დაახლოებითა და ალკოჰოლურ სასმელებზე აქციზის განაკვეთის ოპტიმიზაციის მიზნებით ახსნა.

"ინტერპრესნიუსი"