პატრიარქი განცხადებას ავრცელებს
სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე საქართველოს დამოუკიდებლობის 25 წლისთავთან დაკავშირებით განცხადებას ავრცელებს. პატრიარქმა გაიხსენა ზვიად გამსახურდია, მერაბ კოსტავა და ყველა ადამიანი, რომლებმაც სიცოცხლე შესწირა ან ღვაწლი გასწია ქვეყნის სუვერენიტეტისთვის.
”25 წელი გავიდა საქართველოს დამოუკიდებლობის გამოცხადებიდან. ქვეყნის ისტორიისთვის ეს მცირე დროა, მაგრამ თითოეული ჩვენგანისთვის სიცოცხლის სერიოზული ნაწილი. დამოუკიდებლობა დიდი ტვირთია, დიდი პასუხისმგებლობაა, ჩვენისთანა პატარა სახელმწიფოსთვის კი იგი, მით უმეტეს, ძნელად მისაღწევი და ასევე ძნელად გასავლელი გზაა; ამიტომაც, ბუნებრივია, რომ ამ ხნის განმავლობაში დიდი სირთულეები შეგვხვდა და ეს პროცესი კვლავაც გრძელდება, რასაც, სამწუხაროდ, თან ერთვის მსოფლიო კრიზისიდან მომდინარე პრობლემებიც.
ჩვენი ხალხის სასახელოდ უნდა ითქვას, რომ, მიუხედავად ხანგრძლივი გაჭირვებისა და იწროების, მიუხედავად დიდი ტკივილისა და მწუხარებისა, გავუძელით დროის გამოცდას. ერმა ღირსება და ღირებულებები არ დაკარგა და დამოუკიდებელი საქართველოს ერთგულ დამცველად დარჩა.
ღმერთმა ნათელში ამყოფოს ბატონი ზვიად გამსახურდია, მერაბ კოსტავა და ყოველი ადამიანი, რომლებმაც სიცოცხლე შესწირა ან ღვაწლი გასწია ქვეყნის სუვერენიტეტისთვის. ღმერთმა, ყოვლადწმინდა ღვთისმშობლის მეოხებით, ყოველთა წმინდანთა და ჩვენი წინაპრების ლოცვით, განამტკიცოს, განაძლიეროს და თავის საზღვრებში აღადგინოს სრულიად საქართველო. გულითადად გილოცავთ დამოუკიდებლობის 25 წლისთავს! ”, - ნათქვამია პატრიარქის განცხადებაში.
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
