საქართველოს მთელს ტერიტორიაზე დღეს წვიმს, მაღალმთიან რაიონებში კი თოვს. კერძოდ, როგორც "ამბები.გე"-ს გარემოს ეროვნული სააგენტოს მოკლევადიანი პროგნოზების სამართველოს უფროსმა დოდო გვაზავამ განუცხადა, თოვს ბაკურიანში, გუდაურსა და სტეფანწმინდაში, ასევე, მესტიასა და შოვში.
მათივე განმარტებით, თოვლის საფარმა შოვში 4სმ; მესტიაში - 10სმ; ბაკურიანში - 2სმ; გუდაურში - 13სმ; სტეფანწმინდაში - 3სმ შეადგინა.
ამასთან, გვაზავას თქმით, აღმოსავლეთ საქართველოს ჩრდილო-მაღალმთაში ღამით ყინვაც დაფიქსირდა. კერძოდ, დევდორაკზე -4 გრადუსი; გუდაურში -5; სტეფანწმინდაში -2; ღამით ჰაერის ტემპერატურა შედარებით მაღალი იყო სამხრეთ საქართველოს მაღალმთაში . კერძოდ, წალკაში - +3; ახალქალაქში - +2; ბაკურიანი - 0.
ხვალ დღისით დასავლეთ საქართველოს უმეტეს რაიონში გამოიდარებს და ზოგან აღმოსავლეთის მიმართულების ქარი გაძლიერდება. კვირის ბოლომდე შენარჩუნდება უმეტესად უნალექო ამინდი დასავლეთ საქართველოში. ჰაერის მაქსიმალური ტემპერატურა კი 20-22 გრადუსს მიაღწევს.
აღმოსავლეთ საქართველოს უმეტეს რაიონში კი დღეს საღამოს უმეტეს რაიონში წვიმაა მოსალოდნელი, მაღალმთიან რაიონებში კი თოვლი. კერძოდ, 18 ოქტომბრის ღამით ფასანაური-თიანეთის ტერიტორიაზე მოსალოდნელია თოვლი. ხვალ წვიმა კახეთის რეგიონში, მათ შორის თბილისში შენარჩუნდება და უმეტესწილად ღრუბლიანი ამინდი იქნება. დღისით ბარში ჰაერის მაქსიმალური ტემპერატურა 7-9 გრადუსია მოსალოდნელი.
აღმოსავლეთ საქართველოში 19 ოქტომბრის შუადღიდან გამოიდარებს. სამხრეთიდან თბილი ჰაერის მასები შემოვა, რის შედეგადაც გარკვეულწილად დათბება.
It is already snowing in Georgia’s highlands – Upcoming weather forecast