"ხიშნიკი" მძღოლები და კატასტროფული ვითარება საქართველოს გზებზე - როგორ ირღვევა მგზავრის და მძღოლის უფლებები

"ხიშნიკი" მძღოლები და კატასტროფული ვითარება საქართველოს გზებზე - როგორ ირღვევა მგზავრის და მძღოლის უფლებები

ადამიანის უფლებებს რომ დაცვა სჭირდება და არ უნდა დაირღვეს, ამაზე არავინ კამათობს, მაგრამ რამდენადაა ისინი დაცული, ეს ნამდვილად სადავო საკითხია.

დღეს მძღოლებზე მოგვიწევს საუბარი. საინტერესოა, კონკრეტულად, როგორ ირღვევა მათი უფლებები?! ამასთან დაკავშირებით "ფრიდრიხ ებერტის ფონდის" მხარდაჭერით კვლევა ჩატარდა: ინტერესის სფერო იყო სწორედ ის, რამდენად დაცულია მძღოლის უფლებები. მსგავსი კვლევა საქართველოში, როგორც ამბობენ, არასდროს განხორციელებულა. ეს საკითხი პირველად ტრანსპორტისა და გზების ასოციაციამ შეისწავლა...

AMBEBI.GE ასოციაციის პრეზიდენტს - დავით მესხიშვილს ესაუბრა:

- მძიმე ეკონომიური პირობების ფონზე ბევრს სურს, გახდეს მძღოლი, მაგრამ მათგან ვინ არის პროფესიონალი (ვგულისხმობ ადამიანებს, რომელებიც ამ პროფესიით ოჯახს არჩენენ) და ვინ მოყვარული, ამის გარჩევა ძალიან ჭირს. ფაქტი ის არის, რომ ჩვენი მოქალაქეების უმრავლესობა ცდილობს, გარკვეული ფინანსები იშოვოს. მოკლედ, გამოვკითხეთ კონკრეტულად დასაქმებული მძღოლები, რომლებსაც მგზავრები გადაჰყავთ (მიკროავტობუსების, ავტობუსების, მეტროს მემანქანეები).

- კვლევისას მთავარი რა იყო?

- მაგალითად, შრომითი ხელშეკრულება (კონტრაქტი): 2 ვერსია იყო, ერთი, როდესაც მათ არ იციან კონტრაქტის შინაარსი და დოკუმენტზე ხელი ბრმად აქვთ მოწერილი, კომპანია კი დიდად არ ინტერესდება, მათ კონტრაქტის შინაარსი გააცნოს;

მეორე - კონტრაქტის შინაარსი იციან, მაგრამ იძულებულები არიან, ხელი მოაწერონ, რადგანაც სხვა სამსახური არ არსებობს, თუმცა ეს პირობები არის სრულიად კაბალური. მაგალითისთვის გეტყვით, - იყო გარკვეული ტაქსოკომპანიები, რომლებიც მძღოლებს ეუბნებოდნენ, რომ ავტომობილი ჩვენია, აქ 4 წელი თუ იმსახურებ და ყოველდღე 50 ლარს შემოიტან, შემდეგ მანქანას შენზე გადავაფორმებთ. სწორედ ასეთმა კომპანიებმა სამი წლის და 8 თვის შემდეგ ადამიანები სამსახურიდან გაუშვეს. მძღოლებმა სასამართლო პროცესი ვერ მოიგეს.

- ასეთ დროს პასუხისმგებლობა ვის ეკისრება?

- ხელშეკრულება გარკვეული ხრიკებით არის მომზადებული, რომელსაც მძღოლი გულდასმით არ ეცნობა და ხელს ისე აწერს. ამით კომპანიები სარგებლობენ და მძღოლები ზარალდებიან. კონტრაქტში მისი შემდგენლები წერენ იმას, რაც მათ სურთ...

შემდეგი საკითხი იყო, - თბილისის მიკროავტობუსები: მძღოლებს კომპანიასთან არ აქვთ დალაგებული ურთიერთობა და შესაბამისად, აქვთ მუდმივი შიში, რომ შესატან თანხას გაუზრდიან. რის ფონზეც არსებობს რისკი, რომ მიკროავტობუსით მგზავრობა ქალაქში გაძვირდეს. ამასთან, მიკროავტობუსების ასაკმაც მოიმატა, უფრო ხშირად სჭირდებათ სარემონტო სამუშაოები, რის ხარჯებსაც თავად მძღოლი სწევს. რაც უფრო ძველია მანქანა, უფრო ხშირად უწევს თანხის გადახდა, რადგან სარემონტო და შესაკეთებელია. ამიტომ მძღოლები თბილისის მიკროავტობუსის შემთხვევაში დიდი წნეხის ქვეშ არიან, მათ შემოსავალი ყოველდღიურად უმცირდებათ.

- ალბათ ამიტომაც არის მიკროავტობუსებში ის ქაოსი და გაუგებრობა, რაზეც მგზავრები მუდმივად წუწუნებენ.

- მოხდა ასეთი რამ: 101 მიკროავტობუსის მძღოლებმა მანქანები თვითნებურად გაზზე გადაიყვანეს, რაც ფეთქებადსაშიშია და კატეგორიულად დაუშვებელი; ამასთან, არის გაწელილი რეისები, რომელიც მთელ ქალაქს წრეს არტყამს, რითაც მგზავრების ზენორმირებული გადაყვანა ხდება (რომ მძღოლს რაც შეიძლება მეტი თანხა დარჩეს), რადგანაც მისმა ხარჯმა მოიმატა...

- 101 სამარშრუტო ტაქსის მძღოლების თვითნებობას რა მოჰყვა?

- თბილისის მერიამ ისინი დააჯარიმა, მაგრამ ეს სიტუაციას არ ასწორებს... მიკროავტობუსებში ნასვამ მგზავრებთან ხშირად იქმნება კონფლიქტური სიტუაცია, - ამ თემაზე მძღოლები მწვავედ საუბრობენ...

აღსანიშნავია საკითხიც - საქალაქთაშორისო ტრანსპორტში სრული კატასტროფაა. მაგალითად, თუ მანქანა თბილისიდან ქუთაისში მიდის, იქ ისეთი სიტუაციაა, რომ მძღოლის უფლებებზე საერთოდ არ არის ლაპარაკი, - მას სადგურებზე მოსასვენებელი ოთახი სჭირდება, საშხაპე, რომ მოწესრიგდეს, სასმელი წყალი, ავტობუსიც უნდა გაირეცხოს, - თან, ეს ყველაფერი კანონით უნდა იყოს დარეგულირებული, მაგრამ აღსანიშნავია, რომ ყველა საერთაშორისო სტანდარტი დარღვეულია...

- რა ვითარებაა უშუალოდ სადგურებზე?

- იქ ორი პრობლემა გამოიკვეთა: ერთი, ვინც კანონში არის მოქცეული, იმ მძღოლებს არ აქვთ დასვენების, შხაპის მიღების საშუალება, წარმოიდგინეთ, იქ სასმელი წყალიც არ არსებობს და მეორე, ამის ფონზე ვიღებთ ე.წ. "ხიშნიკ" (მტაცებელ) მძღოლებს, როცა ერთი ნაწილი მეორე ნაწილის უფლებებს არღვევს...

- ვინ არიან ეს მტაცებელი მძღოლები?

- ისინი, რომლებსაც "ბე" კატეგორიის მართვის მოწმობით (ჩვეულებრივი მართვის მოწმობა) გადაჰყავთ მგზავრები ისე, რომ მგზავრის გადაყვანის არანაირი უნარ-ჩვევა არ აქვთ. არადა, ეკრძალებათ 8 და მეტი მგზავრის გადაყვანა, მაგრამ ამას კლიენტების აყვანის მიზნით აკეთებენ ("დე" კატეგორია უნდა ჰქონდეთ), ხდება გზაზე გადასწრება, რასაც იმ სტანდარტების დარღვევამდე მივყავართ, საგზაო უსაფრთხოება რომ ჰქვია. მოკლედ, მგზავრებს იტაცებენ, რაც გზებზე კატასტროფულად მძიმე სიტუაციებს ქმნის.

მაგალითად, თუ სადგურიდან ასე თუ ისე მოწესრიგებული ავტობუსი გავიდა და ეს ე.წ. მტაცებელმა ეს გაიგო, რომელსაც არ აქვს გავლილი ტექდათვალიერება, არ ვიცით ვინ არის და აქვს თუ არა შესაბამისი მართვის მოწმობა. ვიმეორებ, ეს საფრთხის შემცველია.

რაც შეეხება სადგურებს, იქ ტექდათვალიერებას უნდა გადიოდნენ, მაგრამ გადიან ფორმალურად, უფრო სწორად, ამას აკეთებენ იმისთვის, რომ საბუთი მოიპოვონ. არადა, სინამდვილეში მაგისტრალზე რამდენი მანქანა გვინახავს, რომელზეც გვითქვამს, ამას რა უნდა გზაზე?!

დღეს საქართველოში ტექდათვალიერებას 110 000 სატრანსპორტო საშუალება ექვემდებარება, მაგრამ ამ მას მხოლოდ 30.000 გადის. ეს ნიშნავს იმას, რომ ამ პროცედურის გავლის გარეშე, გზაზე არის უამრავი სატრანსპორტო საშუალება, რომელთაც მგზავრები გადაჰყავს...

- ამ ყველაფრის ფონზე, რა რეკომენდაციების გაცემა შეგიძლიათ?

- იმისთვის, რომ უკანონო ავტოსადგურები აღიკვეთოს, მივმართეთ შინაგან საქმეთა სამინისტროს. ეკონომიკის სამინისტროს აქვს ბერკეტები, შეისწავლოს, - სად არის ეს უკანონო სადგურები და ინფორმაცია შინაგან საქმეთა სამინისტროს მიაწოდოს. შსს-ს ვთხოვეთ, ე.წ. მტაცებლების გადაადგილება აღიკვეთოს, რადგანაც გზებზე სიცოცხლის საფრთხეს ქმნიან. ისინი მგზავრთა არასწორ გადაყვანას ახდენენ თუნდაც მაშინ, როდესაც სატრანსპორტო საშუალებაში 12 ადგილია და სალონში 24 მგზავრი ზის. ვიმეორებ, ეს ყველას უსაფრთხოების სტანდარტის დარღვევაა...

- ეკონომიკის სამინისტროს მიმართ კიდევ რა რეკომენდაციები გაქვთ?

- სადგურებზე მოითხოვოს სტანდარტების დაცვა, ამისთვის შეიქმნას მძღოლის მოსასვენებელი პირობები, - შხაპი, სასმელი წყალი... რეალურად ჩატარდეს ტექდათვალიერებები; მოვუწოდეთ, რომ რეისის წინ მძღოლების სამედიცინო შემოწმება (რაც კანონით არის გათვალისწინებული) რეალურად ამოქმედდეს, - მას ახლა ფორმალური ხასიათი აქვს. ხაზზე არ უნდა გავიდნენ ნაბახუსევი და ნასვამი მძღოლები, - ესეც რომ არ იყოს, მათი წნევის კონტროლი უნდა მოხდეს, შეიძლება მხედველობის პრობლემაც ჰქონდეთ...

ამრიგად, ეკონომიკის სამინტრომ ეს საკითხები უნდა დახვეწოს და ასევე შეასრულოს ევროდირექტივა, ეს ჩამწერ-მაკონტროლებელი სისტემის მოწყობასაც ეხება. მოწყობილობა ავტომობილში მაგრდება, რითაც იმის აღნუსხვა ხდება, მძღოლმა რამდენი ხანი დაისვენა, რა სიჩქარით იარა. დიახ, აქ მხოლოდ და მხოლოდ ჩვენს უსაფრთხოებაზეა ლაპარაკი.

ასევე ყურადსაღებია ისიც, რომ მიკროავტობუსების დიდი ნაწილი სატვირთოა, რომლებიც სამგზავროდ არის გადაკეთებული, რადგანაც სატვირთოს შეძენა იაფი ჯდება. ისე რომ, ზოგიერთს ფანჯრებიც კი არ აქვს, დარღვეულია სავარძლებისა და სალონის მოწყობის სტანდარტი და ა.შ.

თბილისის მერიისგან ასევე მოვითხოვეთ: იქ, სადაც მიკროავტობუსების ბოლო გაჩერებებია, სველი წერტილები გაკეთდეს, რადგანაც არსად ეს არ არის და მძღოლებს ბუნებრივი მოთხოვნილების დაკმაყოფილება სხვადასხვა ადგილას უწევთ...

საბოლოოდ კი, მთავრობას მივმართავთ, - საქართველოს ხელისუფლებაში განისაზღვროს ტრანსპორტზე პასუხისმგებელი ერთი უწყება, რადგანაც დღეს ტრანსპორტზე მუშაობს შინაგან საქმეთა სამინისტრო, ინფრასტრუქტურის, ეკონომიკის სამინისტროები და მუნიციპალიტეტი...

ლალი ფაცია

AMBEBI.GE

უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"

ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია

8-9 ოქტომბერს ძლიერი წვიმა და ქარია, 10-ში კვლავ გამოიდარებს - უახლოესი დღეების ამინდის პროგნოზი