"სკოლაში შეშა არ არის", "გოგოებისთვის შარვალი არ შეიძლება" - რას წერენ მოსწავლეები სადახლოს სკოლიდან

პედაგოგი ნათია მანია, რომელიც ეთნიკური აზერბაიჯანელებით დასახლებულ სოფელ სადახლოში ასწავლის, ფეისბუქის პირად გვერდზე საინტერესო ფოტოს ავრცელებს შემდეგი მინაწერით:

"როგორია ჩემი სკოლა. დაწერილია მერვეკლასელთა კარნახით. არაფერი მიმიმატებია და არაფერი მომიკლია. მხოლოდ გავმართე ენობრივად" - წერს ნათია მანია და განმარტავს, რომ ფოტო სადახლოს მეორე საჯარო სკოლაშია გადაღებული.

დაფაზე მოსწავლეების კარნახით დაწერილი უამრავი პრობლემის შესახებ ვკითხულობთ: "აქ შეშა არ არის", "დგას გატეხილი ღუმელები", "გოგოებისთვის შარვალი არ შეიძლება", "სკოლაში წყალი 1 დღე მოდის, 2 დღე არ არის", "ეზოში ბურთის თამაში არ შეიძლება" და ა.შ.

ნათია მანია სადახლოში ასწავლის პროგრამა "ვასწავლოთ ქართული, როგორც მეორე ენა" ფარგლებში. აღნიშნული პროგრამა გულისხმობს ქართული ენისა და ლიტერატურის კვალიფიციური მასწავლებლების მივლინებას სამცხე-ჯავახეთის, ქვემო ქართლისა და კახეთის ეთნიკური უმცირესობებით დასახლებული სოფლების იმ არაქართულენოვან სკოლებში, სადაც განსაკუთრებით მწვავედ დგას ქართული ენის ცოდნისა და სწავლების საკითხი.