"სიხარულის მოლოდინი, ასეთი ტრაგედიით დასრულდა" - რას ჰყვება ქუთაისის შემოვლით გზაზე დაღუპული ოჯახის მეზობელი ავარიის დეტალებზე

ქუთაისი-ზესტაფონის შემოვლით გზაზე მომხდარი ავტოსაგზაო შემთხვევა მსხვერპლით დასრულდა. შემთხვევა გუშინ, 22 აპრილს საღამოს საათებში მოხდა და როგორც შინაგან საქმეთა სამინისტრო იტყობინება, ერთმანეთს სამი ავტომანქანა შეეჯახა, რის შედეგადაც ადგილზე დაიღუპა 5 ადამიანი. ავარიის დროს დაშავებული კიდევ ერთი ადამიანი ქუთაისის რეფერალურ ჰოსპიტალში მიყვანის შემდეგ გარდაიცვალა.

ცნობილი ხდება რომ, გარდაცვლილთაგან ოთხნი ერთი ოჯახის წევრები იყვნენ - და-ძმა იმედო და ნინიკო გოგმაჩაძეები, მათი მამა ომარი გოგმაჩაძე და იმედო გოგმაჩაძის მეუღლე, დალი დოლიძე.

AMBEBI.GE გოგმაჩიძეების მეზობელს, ანზორ გუნთაიშვილს დაუკავშირდა:

- ომარ გოგმაჩაძის შვილი, 19 წლის ივერი გოგმაჩაძე სამი თვის წინ ჯარში გაიწვიეს, თბილისში მსახურობს, ოჯახს ამ პერიოდის მანძილზე არ ჰყავდა ვაჟი ნანახი, რადგან აქამდე ამის უფლებას სამხედრო სამსახური არ აძლევდა და გუშინ წავიდნენ მის სანახავად თბილისში. თბილისიდან ქობულეთში, სახლში ბრუნდებოდნენ, რა დროსაც მოხდა ავარია, რომლის შედეგად ომარი, მისი ორი შვილი და რძალი დაიღუპა. ბებია, ომარის მეუღლე და 19 წლის ვაჟი დარჩა ამხელა ოჯახიდან. ომარის ცოლი თურქეთში იმყოფება სამუშაოდ. რძალი 7 თვის ორსული იყო, ბობოყვათში, სამკერვალო ფაბრიკაში მუშაობდა. ერთ თვეში დეკრეტში გასვლას აპირებდა, მაგრამ ამხელა სიხარულის მოლოდინი, ასეთი ტრაგედიით დასრულდა. ოჯახი განადგურდა.

- რას საქმიანობდა თავად ოჯახის უფროსი?

- ხელოსანი ხალხი იყო, მშრომელი, პატიოსანი ოჯახი. ომარიმ ცოტა ხნის წინ პარალიჩი მიიღო და ბოლო დროს დაიწყო გამოჯანმრთელება, ნელ-ნელა გამოდიოდა მდგომარეობიდან.

- რას ამბობენ, რა გახდა ავარიის მიზეზი?

- ომარი მისი შვილის ნათლიის "მერსედესით" იყო თბილისში წასული. ამბობენ, მანქანა ტექნიკურად გაუმართავი იყო, "აბგონზე" არასწორად გავიდა, რა დროსაც კამაზს შეეჯახა, იმასაც ქობულეთელი მართავდა. სამი მანქანა შეეჯახა ერთმანეთს, მაგრამ ექსპერტიზა დაადგენს, რა მოხდა რეალურად. ტრაგედია ტრიალებს, ბიჭი ჩამოვიდა ჯარიდან დღეს, ოთხი მკვდარი ყავთ ოჯახში - ენით აუღწერელი უბედურებაა.

თამარ ბოჭორიშვილი

AMBEBI.GE

წაიკითხეთ ასევე: "იმედო ახალი დაოჯახებული იყო და ბავშვსაც ელოდებოდა" - ვინ არიან ქუთაისის შემოვლით გზაზე ავარიაში დაღუპულები

რას ყვება სასწრაფოს ექიმი ქუთაისის შემოვლით გზაზე მომხდარი ავარიის შესახებ