ადამიანთა ნაწილი თავისი შრომით ირჩენს თავს (ამიტომაც, მათი უმეტესობა ძალზე ღარიბია), ზოგი - ქურდობით ან თაღლითობით, ზოგი კიდევ, ადამიანების ჩაშვებით - ე.წ. ნასედკობით. მოკლედ, როგორც ცნობილია, ფულის შოვნის ათასგვარი მეთოდი არსებობს. ჩვენი რესპონდენტი ადამიანთა იმ კატეგორიას მიეკუთვნება, ვინც სხვისი უბედურების ხარჯზე ცდილობდა ცხოვრების აწყობას, რადგან მიაჩნდა, რომ ამქვეყნად დანდობის ღირსი არავინ არის, მაგრამ მერე მიხვდა, რომ ძალიან ცდებოდა; საყვარელმა ადამიანმა აიძულა, ცხოვრების წესი შეეცვალა. ახლა ძალიან დარდობს წარსულში ჩადენილს და ახალგაზრდებს სთხოვს, მისი შეცდომა არ გაიმეორონ.
ზურა, 51 წლის:
- ბავშვობის წლები ქუჩაში გავატარე. მამა ლოთი მყავდა, დედა კი ერთი საცოდავი ქალი იყო. უბნის ბიჭებს შევეკედლე, სკოლაში არ დავდიოდი, სახლში მხოლოდ დასაძინებლად შევდიოდი და მაშინაც მამაჩემის მრავალსართულიანი გინების მოსმენა მიწევდა. ჩემთვის მოფერება, კეთილი სიტყვები არავის ემეტებოდა, მხოლოდ ქუჩის მეგობრები მეუბნებოდნენ სიტყვას - "ყოჩაღ", როცა მათ დავალებას შევასრულებდი...
- რა დავალებებს გულისხმობთ?
- თავიდან წვრილმანი საქმეები იყო. მეგობრებს ვიღაცებისთვის ჭკუის სწავლებაში ვეხმარებოდი და უკვირდათ, ასე პატარას, ამდენი ძალა საიდან გაქვს, თან, კუნთებიც რომ არ გეტყობაო?! პატარაობიდან ვვარჯიშობდი - ერთადერთი კარგი რამ, რასაც მამამ მიმაჩვია, ვარჯიში გახლდათ. ახალგაზრდობაში ის მოკრივე იყო და ვიდრე გალოთდებოდა, აქტიურად ვარჯიშობდა, მეც სპორტული ცხოვრების სიყვარულს მინერგავდა.
- მერე რამ შეცვალა, სმა რატომ დაიწყო?
- ამბობდა, რომ ცხოვრებამ გაალოთა, მაგრამ რას გულისხმობდა, ვერ ვხვდებოდი. იმ პერიოდში არავის ულხინდა, მაგრამ ჩემი მეგობრის მამები არ გალოთებულან...
- როცა ქუჩაში გახვედით და "საქმის გარჩევებში" მონაწილეობდით, რამდენი წლის იყავით?
- 13 წლის ვიყავი... გარდატეხის ასაკში გახლდით და ხომ იცით, ამ პერიოდში მოზარდებს თავი ყოვლისშემძლეებად მიაჩნიათ. მეც ასე ვიყავი, ვმამლაყინწობდი... 15 წლის ვიყავი, როცა პირველ სერიოზულ "საქმეზე" გავყევი ბიჭებს - მაღაზია გავტეხეთ. მაყუთი და ძვირად ღირებული ნივთები გამოვიტანეთ. წილიც მომცეს. იმ დღეს, ჩემზე ბედნიერი არავინ იყო, რადგან შემეძლო, ჩემი ნაშოვნი ფულით ის მეყიდა, რაც მინდოდა... მოკლედ, თქვენებურად - ანუ პატიოსანი ადამიანების სიტყვებით რომ ვთქვათ - ხელმრუდობას მივეჩვიე და ორი თითის ჯიბეში ჩაცურებაც ვისწავლე. ამ საქმეში საკმაოდ კარგად გავიწაფე. მალე, მეგობრები უჩემოდ არც ერთ საქმეზე არ მიდიოდნენ. ვისწავლე ცხოვრების ფასი, ვიგრძენი ფულის სუნი, მისი გემო... განაგრძეთ კითხვა