"რუსთავი2"-ში საგანგებო თათბირი დაინიშნა

სამაუწყებლო კომპანია "რუსთავი2"-ში საგანგებო თათბირი დაინიშნა, - აღნიშნულის შესახებ "ინტერპრესნიუსს" "რუსთავი 2"-ის თანამშრომლებმა განუცხადეს.

მათი ნაწილი აცხადებს, რომ თათბირზე მთავარი თემა არხის გენერალური დირექტორის გადადგომის საკითხი იქნება, ნაწილი კი ამბობს, რომ ნიკა გვარამია ჯერჯერობით "რუსთავი 2"-ის შენობაში არ იმყოფება.

რამდენიმე წუთის წინ ტელეკომპანიის შენობაში შევიდნენ გენერალური დირექტორის მოადგილე ზაალ უდუმაშვილი, საინფორმაციო სამსახურის უფროსი ნოდარ მელაძე, კომპანიის ადვოკატები თამთა მურადაშვილი და დიმიტრი სააძაგლიშვილი. ასევე, კომპანიაში შევიდნენ არხის საინფორმაციო სამსახურის თანამშრომლები. შესვლამდე არხის გენერალური დირექტორის მოადგილეს, ზაალ უდუმაშვილს ჟურნალისტებთან კომენტარი არ გაუკეთებია. ნიკა გვარამიას გადადგომის შესახებ ინფორმაცია ცოტა ხნის წინ გავრცელდა.