პაპუნა კოხტაშვილი ბიზნესსაქმიანობაში 15 წლის ასაკიდანაა ჩართული. 23 წლის იყო, როცა საქართველოში სრულიად ახალი, რეცირკულარული აკვაკულტურის სისტემა შემოიტანა და უცხოელ პარტნიორებთან ერთად სართიჭალის ტერიტორიაზე აფრიკული ლოქოს ორი სახეობის წარმოება დაიწყო...
პაპუნა კოხტაშვილი:
- როდესაც თავდაპირველად აკვაკულტურის პრიორიტეტების შესახებ წავიკითხე, ამ ინფორმაციის აღქმა გამიჭირდა. მაგრამ მას შემდეგ, რაც ლოქოს სპეციფიკა და საარსებო პირობები შევისწავლე, მივხვდი, რომ ეს შესაძლებელია. ამ რთულ და სარისკო პროექტში ჩემი უცხოელი პარტნიორების დახმარებით საკმაოდ დიდი ინვესტიცია, რამდენიმე ასეული ათასი დოლარი ჩაიდო. გვქონდა კრიტიკული პერიოდებიც. იმდენად რთული სისტემაა, მცირე შეცდომამ შესაძლოა, თევზის მთლიანი რაოდენობის ერთ დღეში დახოცვა გამოიწვიოს. ჩვენი მეურნეობა სამას კვადრატულ მეტრ ფართობს მოიცავს. შემიძლია, 80 ტონა ლოქო ჩავსვა და წელიწადში 150 ტონა გავყიდო, რაც დამეთანხმებით, საკმაოდ ბევრია. იმავე შედეგების მისაღწევად ტბის პირობებში რამდენიმე ათეული ჰექტარია საჭირო. წყლის ტემპერატურული კონტროლის სისტემა, მექანიკური და ბიოლოგიური ფილტრები ჯანსაღი თევზის გამოყვანის საშუალებას გვაძლევს.
- საქართველოში ძირითადად, ევროპული ლოქოა გავრცელებული, თქვენ კი აფრიკული ლოქოს სახეობები გაამრავლეთ...
- კონკრეტულად ამ ჯიშის ლოქოს გაზრდა საქართველოს ბუნებრივ პირობებში შეუძლებელია, რადგან თბილი წყალი უყვარს. შესაბამისად, ტბაში გაშვებული ზამთარში დაიღუპება. რეცირკულარული სისტემის საშუალებით არა მხოლოდ აფრიკული ლოქოს, არამედ ბევრი სხვა ჩვენი რეალობისთვის უცხო ჯიშის წყლის ბინადრების - ზვიგენების, ნიანგების მოშენებაა შესაძლებელი... აფრიკული ლოქო ძალიან დიდი რაოდენობით ცხიმის მჟავებს, B და D ვიტამინებს შეიცავს. კვლევების მიხედვით, ლოქოთი კვების შემთხვევაში, საგრძნობლად მცირდება კიბოს, გულ-სისხლძარღვთა დაავადებების, ინფარქტის რისკი. თევზი ერთ-ერთი ყველაზე მნიშვნელოვანი კვების პროდუქტია. მასში შემავალ ვიტამინებს მნიშვნელოვანი დატვირთვა აქვს ბავშვის ტვინის ფუნქციონალური ჩამოყალიბების, მხედველობის, გულ-სისხლძარღვთა და ძვალ-სახსროვანი სისტემის განვითარებისთვის. გარდა ამისა, ძალიან დაბალკალორიულია, დიდი რაოდენობით შეიცავს პროტეინს. შეუძლებელია ბოსტნეულით ან ხორცპროდუქტებით ის ამინომჟავები და ცილები ჩაანაცვლო, რასაც თევზი შეიცავს.
- თუ ახერხებთ, კონკურენცია გაუწიოთ იმპორტირებულ, გაყინულ თევზს?
- ჩვენთან თევზის 80% იმპორტირებულია, მაშინ, როცა საქართველო მდინარეების ქვეყანაა. ფასის თვალსაზრისით, ადგილობრივად წარმოებული თევზი შემოსულ პროდუქტს კონკურენციას ვერ უწევს. ასე რომ, ჩვენი დოვლათი გარეთ გაედინება... თევზი ჩვეულებრივი ცოცხალი ორგანიზმია. უდიდესი მნიშვნელობა აქვს, რა გარემოში, პირობებში გაზრდი, როგორ საკვებს მიაწვდი. მსოფლიოს მასშტაბით ბევრი არაჰიგიენური საწარმო მინახავს, რომლებიც ათიათასობით ტონა თევზს ყიდიან. საქართველოში თევზის უმაღლესი ხარისხის საკვების მომწოდებელი არ არსებობს. საერთოდ, თევზის ინდუსტრია სავალალო მდგომარეობაშია. ღარიბულია თევზის კერძებიც. სასურველია, შეფმზარეულებმა მეტი შემოქმედებითობა გამოიჩინონ. სხვათა შორის, ამ მხრივ საზოგადოების ცნობიერების ამაღლება ჩვენი ერთ-ერთი სერიოზული გეგმაა...განაგრძეთ კითხვა gza.ambebi.ge-ზე