GWP თბილისის რამდენიმე რაიონში წყლის შეწყვეტასთან დაკავშირებით განცხადებას ავრცელებს
"ჯორჯიან უოთერ ენდ ფაუერი" 24-26 ივლისს გერმანელ ექსპერტებთან ერთად ცენტრალური მაგისტრალური თუჯის მილზე სარეაბილიტაციო სამუშაოებს ჩაატარებს.
როგორც "ინტერპრესნიუსს" "ჯორჯიან უოთერ ენდ ფაუერიდან" აცნობეს, მომდევნო კვირის დასაწყისში პეკინის ქუჩის მარცხენა მხარეს გამავალი 1000 მმ-იანი, 1.3 კმ სიგრძის მაგისტრალის განახლება უახლესი ევროპული ტექნოლოგიით მოხდება, რაშიც კომპანიას გერმანული ფირმის, ღღთ RRT Ingenieurburo Weidt-ის ექსპერტები დაეხმარებიან.
"პარალელურად განხორციელდება 1000მმ-იანი ახალი, ევროსტანდარტის შესაბამისი ჩამკეტ-მარეგულირებელი ურდულის დამონტაჟება. ასევე, მოეწყობა 500 მმ-იანი წყალსადენის ქსელის დამცლელი.
აღნიშნული უმნიშვნელოვანესი ინფრასტრუქტურული და ტექნიკური სამუშაოების შეუფერხებლად განხორციელებისთვის 24, 25, 26 ივლისს, დილის 11.00 საათიდან საღამოს 19.00 საათამდე და საღამოს 23.00 საათიდან დილის 08.00 საათამდე წყალმომარაგება შეეზღუდებათ:
საბურთალოს რაიონში - თამარაშვილის, ნუცუბიძის და მიმდებარე ქუჩებს; ნუცუბიძის და ვაჟა-ფშაველას კვარტლებს;
ვაკის რაიონში: ჭავჭავაძის გამზირის ნაწილს, კეკელიძის, მცხეთის და მიმდებარე ქუჩებს.
მთაწმინდის რაიონში - ბაგებს, წყნეთს და კიკეთს 24 ივლისიდან 26 ივლისის ჩათვლით წყალმომარაგება შეეზღუდება 17.00 საათიდან მომდევნო დღის 13.00 საათამდე;
კომპანია მიმდინარე სამუშაოებისას მოსახლეობას წყალს ცისტერნებით მიაწვდის. წყალმომარაგების შეზღუდვისა და აღდგენის შესახებ დამატებით ინფორმაციას „ჯორჯიან უოთერ ენდ ფაუერი“ აბონენტებს წინასწარ, SMS-შეტყობინების სახით მიაწოდებს. დეტალური ინფორმაციის მოძიება შესაძლებელია ასევე კომპანიის ცხელი ხაზის – 2 93 11 11, ფეისბუქისა და ვებგვერდის მეშვეობით – http://www.gwp.ge“, - აღნიშნულია კომპანიის ინფორმაციაში.
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია
