ალილო "ვარდების მოედნიდან" დაიწყება

შობის დღესასწაულთან დაკავშირებით ტრადიციული ალილო დღეს, 14:00 საათზე, "ვარდების მოედნიდან" დაიწყება. როგორც "ინტერპრესნიუსს" საპატრიარქოს მისიისა და ევანგელიზაციის განყოფილების თანამშრომელმა ბარბარე რუხაძემ განუცხადა, მსვლელობას ტრადიციულად თეატრალიზებული სახე ექნება, ანალოგიური, როგორც გასულ წელს იყო.

მსვლელობის მონაწილეები რუსთაველის გამზირზე საჩუქრების მისაღებად პარლამენტის შენობასთან შეჩერდებიან; მსვლელობა თავისუფლების მოედნისკენ გაგრძელდება. ალილოს მონაწილეებს თბილისის საკრებულოს წევრები დაასაჩუქრებენ. მსვლელობა პუშკინისა და ბარათაშვილის ქუჩებზე გაგრძელდება. კონკასთან მონაწილეთა ერთი ჯგუფი საპატრიარქოში გადავა. იქ მათ სრულიად საქართველოს კათოლიკოს-პატრიარქი შეხვდებათ და ალილოსთვის ტკბილეულს გადასცემთ, მონაწილეებს დალოცავს.

შემდეგ მსვლელობა ბარათაშვილის ხიდით ბარათაშვილის ქუჩაზე გაგრძელდება და ყოვლადწმინდა სამების ტაძართან დასრულდება. მსვლელობის ბოლოს სამების მღვდელმსახურნი პარაკლისს გადაიხდიან.

ალილოში მონაწილეებს გზადაგზა მოსახლეობა ტკბილეულსა და საჩუქრებს გადასცემს. ყოვლადწმინდა სამებაში მიტანილი შემოწირულობები კი 8-9 იანვარს დახარისხდება და 10 იანვარს ბავშვთა სახლებსა და უმწეოთა თავშესაფრებში გადანაწილდება. ამ მიზნით მერია ავტობუსს გამოყოფს.

საქართველოში "ალილოს" ტრადიცია V-VI საუკუნიდან იღებს სათავეს და ბოლო რამდენიმე წელია კვლავ აღინიშნება.

"ინტერპრესნიუსი"