112-ის თანამშრომლების განცხადება ბახტრიონზე მტაცებელი ცხოველის "დაფიქსირების" შესახებ

ბახტრიონზე მტაცებელი ცხოველის დაფიქსირების შესახებ 112-ში მოსახლეობისგან შეტყობინება შევიდა. როგორც "ინტერპრესნიუსს" 112-ში განუცხადეს, შეტყობინების საფუძველზე შესაბამის ტერიტორიაზე საპატრულო პოლიცია გავიდა.

"ქალი, რომელმაც ჩვენთან დარეკა, აცხადებს, რომ, სავარაუდოდ, ვეფხვი 08:00 საათზე დაინახა და ფოტოები გადაუღო, თუმცა 112-ში ამის შესახებ 12:00 საათისთვის დარეკა. შეტყობინება შესაბამის სამსახურს გადაეცა და ადგილზე საპატრულო პოლიცია მივიდა, რომელმაც თავის მხრივ ცხოველთა მონიტორინგის სამსახური გამოიძახა, თუმცა ტერიტორიის შემოწმების შემდეგ მტაცებელი იქ არ აღმოჩნდა", - აცხადებენ 112-ში.

როგორც "ინტერპრესნიუსს" ზოოპარკის დირექტორმა ზურაბ გურიელიძემ განუცხადა, ადგილზე 2 ვეტერინარი იყო გასული. "მათ ცხოველის არანაირი კვალი არ დაუფიქსირებიათ", - განაცხადა გურიელიძემ.

როგორც გურიელიძემ აღნიშნა, მან სოციალურ ქსელში დღეს გამოქვეყნებული ფოტოები ნახა და დარწმუნებულია, რომ ფოტოზე გამოსახული ცხოველი ვეფხვი არ არის, კატაა.

"ინტერპრესნიუსი"