"თელასის" 2000-მდე აბონენტს ელექტროენერგიის მიწოდება ავარიულად შეუწყდა.
როგორც "ინტერპრესნიუსს" "თელასიდან" აცნობეს, 19:15 საათზე, გარე ორგანიზაციამ, რომელიც მიწის გათხრის სამუშაოებს ახორციელებდა, დააზიანა "თელასის" კუთვნილი მაღალი ძაბვის კაბელები, რის გამოც ყაზბეგის გამზირის, თამარაშვილის, დელისის მიმდებარე ტერიტორიასა და მარიჯანის ქუჩის 2000 -მდე მომხმარებელს ელექტროენერგიის მიწოდება შეუწყდა.
მათივე ინფორმაციით, კომპანიის ტექნიკური სამსახურის მიერ მიმდინარეობს აღდგენითი სამუშაოები და ელექტროენერგიის მიწოდება უახლოეს ხანში აღდგება. კომპანია მომხმარებლებს შექმნილი დისკომფორტის გამო ბოდიშს უხდის.