ბათუმის სამშობიარო სახლში გარდაცვლილი 29 წლის მზევინარ შაინიძის ახლობლები ექიმებს უყურადღებობაში ადანაშაულებენ.
"მეუღლე საავადმყოფოში დროულად მივიყვანე. ექიმმა მითხრა, რომ ერთ საათში დაეწყებოდა მშობიარობა, შესაძლო გართულებების შემთხევაში კი საკეისრო კვეთა გახდებოდა საჭირო. საკეისრო კვეთის თანხმობაზე ხელი მოვაწერე და გამოვედი. გავიდა ნახევარი საათი და მეუღლემ დამირეკა - მიშველე, გადამარჩინე, ექიმები შემოვიდნენ, მაგრამ ისევ მარტო დამტოვეს და ცუდად ვარო. ავედი ექიმთან და გავაფრთხილე, ყურადღება მიექციათ. კიდევ რამდენიმე წუთი გავიდა და მეუღლემ დამირეკა, ისევ არ შემოსულან და ცუდად ვარო, ამ დროს მასთან შევიდა ექთანი და ტელეფონში ასეთი რამ მომესმა: - შენ გადარეკე და უთხარი, მარტო ვარო?... პაციენტი მარტო დატოვეს, შემდეგ კი საქმის "გარჩევა" დაუწყეს. გამაგებინეს, რომ ჰემოგლობინი დაბალი ჰქონდა და სისხლის გადასხმა იყო საჭირო. გადაუსხეს სისხლი, ჩატარდა საკეისრო კვეთა და გოგონა მოევლინა ქვეყანას. ჩვენ კი წავედით და ბავშვის დაბადება ტრადიციულად აღვნიშნეთ. გვიან ღამით ისევ დავრეკე მეუღლესთან, მაგრამ არ მიპასუხა, ვიფიქრე, რომ ეძინა.
გამთენიისას დამირეკა და მითხრა, ცუდად ვარ და სასწრაფოდ მოდიო. მივედი საავადმყოფოში და ექიმმა მითხრა, რომ ოპერაციის გაკეთება და საშვილოსნოს ამოღება იყო საჭირო. ვფიქრობ, ჩემი მეუღლე უყურადღებოდ დარჩა, ჰემოგლობინი დაუვარდა და სისხლისგან დაიცალა. ველოდებოდი, რომ საშვილოსნოს ამოჭრიდნენ, თუმცა გამაგებინეს, რეანიმაციაში გადაიყვანეს და დაიღუპაო", - ამბობს გარდაცვლილის მეუღლე მერაბ დიასამიძე.