თბილისის სპორტის სასახლეში ძიუდოს გრან პრის გათამაშება დასრულდა. საქართველოს ნაკრებმა 2 ოქროს, 3 ვერცხლის და 2 ბრინჯაოს მედალი მოიპოვა. როგორც "ინტერპრესნიუსს" სპორტის სამინისტროდან აცნობეს, საქართველომ ვაჟთა შორის გუნდურ ჩათვლაში პირველი ადგილი აიღო. ქართველი ძიუდოისტები ლიდერები გახდნენ საერთო გუნდურ ჩათვლაშიც.
ირაკლი უზნაძის გუნდმა ტურნირის პირველი დღე უმედლოდ დაამთავრა, მეორე დღეს 1 ვერცხლი და 2 ბრინჯაო მოიპოვა, შეჯიბრების დასკვნით დღეს კი 2 ოქროს, 2 ვერცხლის მედალი მოიგო.
საქართველოს ნაკრებიდან ოქროს მედლები ბექა ღვინიაშვილმა (90კგ) და ლევან მატიაშვილმა (+100) მოიპოვეს. ვერცხლის მედლის მფლობელები უშანგი მარგიანი (81), ვარლამ ლიპარტელიანი (90) და ადამ ოქრუაშვილი (+100) გახდნენ, ხოლო ბრინჯაოს მედლები ლაშა შავდათუაშვილმა და ნუგზარ ტატალაშვილმა (ორივე 73) მოიპოვეს.