იაპონიის სამხრეთ რეგიონში მდებარე კუნძულ კუჩინოერაბუძიმადან მოსახლეობის ევაკუაცია მიმდინარეობს. "როიტერის" ცნობით, კუნძულზე ვულკანი სინდაკე ამოიფრქვა, რის გამოც მოსახლეობას საფრთხე შეექმნა.
იაპონიის პრემიერ-მინისტრის სინძო აბეს განცხადებით, კუნძულიდან მოსახლეობის ევაკუაცია ვერტმფრენებით და გემებით მიმდინარეობს. "იძულებული გავხდი საპარლამენტო სესია შემეწყვიტა და მთავრობისთვის დავალებები მიმეცა მოსახლეობის უსაფრთხო ევაკუაციის უზრუნველყოფის მიზნით", - განაცხადა სინძო აბემ.
ამ დროისთვის კუჩინოერაბუძიმაზე 137 ადამიანი ცხოვრობს, მათი დიდი ნაწილი უკვე გაიყვანეს კუნძულიდან. ადგილობრივი ადმინისტრაციის განცხადებით, მსხვერპლი არ არის. თუმცა, დაშავდა ერთი ადამიანი - 72 წლის მამაკაცი, რომელმაც სახის არეში დამწვრობა მიიღო.