ვინ გახდა საპატრულო პოლიციის დეპარტამენტის ახალი დირექტორი

შს მინისტრმა, გიორგი მღებრიშვილმა საპატრულო პოლიციის დეპარტამენტის ახალ დირექტორად გოგა რაზმაძე დანიშნა.

შსს-ს ცნობით, მინისტრი დღეს გოგა რაზმაძეს შეხვდა, თანამდებობაზე დანიშვნა პირადად მიულოცა, მასთან საპატრულო პოლიციის საქმიანობის პრიორიტეტული მიმართულებები განიხილა და დავალებები მისცა.

მინისტრმა საპატრულო პოლიციის ახალ ხელმძღვანელთან შეხვედრისას ყურადღება რამდენიმე მნიშვნელოვან საკითხზე - მათ შორის საგზაო უსაფრთხოებაზე, დანაშაულის პრევენციაზე, ოჯახში ძალადობის წინააღმდეგ ბრძოლაზე, პოლიციელების პროფესიული მომზადებაზე და სამსახურებრივი მოვალეობის შესრულების დროს უსაფრთხოებაზე, ქალი პოლიციელების როლზე და სხვა საკითხებზე გაამახვილა.

საპატრულო პოლიციის დეპარტამენტის ახალი დირექტორი გოგა რაზმაძე პროფესიით იურისტია, დაკავებული იყო საადვოკატო საქმიანობით, აქვს შინაგან საქმეთა სამინისტროში, მთავარ პროკურატურასა და სასჯელაღსრულებისა და პრობაციის სამინისტროში მუშაობის თვრამეტწლიანი გამოცდილება. ბოლო პერიოდში იგი სასჯელაღსრულებისა და პრობაციის სამინისტროში გენერალური ინსპექციის უფროსის მოადგილის თანამდებობას იკავებდა. ჰყავს მეუღლე და შვილი.