ნინო ბურჯანაძე - ზღაპრები იმასთან დაკავშირებით, რომ ღარიბაშვილმა გადაწყვიტა გადადგომა, არავის სჯერა

"დემოკრატიული მოძრაობის" ლიდერის, ნინო ბურჯანაძის განცხადებით, პრემიერ-მინისტრის პოსტის დატოვება არ არის ღარიბაშვილის გადაწყვეტილება.

"სრულიად ნათელია, რომ ქვეყანა შუა საუკუნეების ფეოდალური მეთოდებით იმართება. იმართება ბიძინა ივანიშვილის მხრიდან აბსოლუტურად არაფორმალური მეთოდებით და ყველაფერი არის დამოკიდებული იმაზე, რა ხასიათზე დაიძინებს და გაიღვიძებს ის", - განაცხადა ნინო ბურჯანაძემ "ტელეიმედის" ეთერში.

მისივე თქმით, რამდენიმე დღის წინ მოისმინეს მთავრობის 3 წლის ანგრიშის შეფასება და მას დარჩა შთაბეჭდილება, რომ საუბრობდა წარმატებული, აყვავებული ქვეყნის პრემიერ-მინისტრი.

"პრემიერ-მინისტრი ლაპარაკობდა მხოლოდ წარმატებებზე. ის კმაყოფილი იყო თავისი და თავისი გუნდის მუშაობით და ახლა ზღაპრები იმასთან დაკავშირებით, რომ ამის შემდეგ ღარიბაშვილმა გადაწყვიტა გადადგომა, არავის სჯერა. თუ მოხდა ის, რომ ღარიბაშვილმა გაბედა და რაიმე თემაზე ბიძინა ივანიშვილს შეეკამათა, რასაც მოჰყვა მისი გადაყენება, ამით ღარიბაშვილი ჩემს თვალში მხოლოდ ამაღლდება, თუმცა არ ვიცი რა დგას ამ ყველაფრის უკან, ამიტომ მარჩიელობას არ დავიწყებ", - განაცხადა ნინო ბურჯანაძემ.

მისივე თქმით, თავის დროზე ბიძინა ივანიშვილი რომ დარჩენილიყო ხელისუფლებაში, ნამდვილად არავინ ილაპარაკებდა დღეს არაფორმალურ მმართველობაზე და მმართველობის ფეოდალურ სტილზე.

როგორც ნინო ბურჯანაძემ აღნიშნა, ბიძინა ივანიშვილი გადაწყვეტილებების დროს აზრს არავის ეკითხება და ეს დღესაც გამოჩნდა, როდესაც დილით არც ერთმა წევრმა კოალიციაში, მათ შორის კოალიციის ლიდერებმა არ იცოდნენ, რომ პრემიერი გადადგომას აპირებდა.

"უმრავლესობაში ასევე გაკეთდა კომენტარები, რომ ღარიბაშვილმა გამოცდილება მიიღო, გაიზარდა ამ თანამდებობაზე. ეს რა თავის აგდებაა, ძალიან დიდ ბოდიშს ვიხდი. ივანიშვილმა პრემიერ-მინისტრად დაგვისვა ადამიანი, რომელიც გაიზარდა, ისწავლა ამ თანამდებობაზე. ჩვენზე რა, ცდებს ატარებენ?!", - განაცხადა ბურჯანაძემ.