17 ოქტომბერს რუსთაველის თეატრში გია ყანჩელის ნაწარმოების „დედა ენა“ მსოფლიო პრემიერა გაიმართება!

17 ოქტომბერს რუსთაველის თეატრში გია ყანჩელის ნაწარმოების „დედა ენა“ მსოფლიო პრემიერა გაიმართება!

17 ოქტომბერს, საქართველოს ეროვნული მუსიკალური ცენტრი და ხელოვანთა კავშირი CONCEPT-ART, რუსთაველის თეატრის დიდ დარბაზში წარმოგიდგენთ გია ყანჩელის ნაწარმოების დედა ენა მსოფლიო პრემიერას.

მაესტრომ გასულ სეზონზე, როდესაც გორის სულხან ცინცაძის სახელობის სამუსიკო კოლეჯთან არსებული ბავშვთა გუნდი მოისმინა სცენიდან გამოაცხადა, რომ მათთვის აუცილებლად შექმნიდა ახალ ნაწარმოებს და რამდენიმე თვეში პრემიერა დაინიშნა.

გია ყანჩელი: ”რაც უფრო ხმაურიანი ხდება გარემო, მით უფრო მიჩნდება სურვილი მუსიკაში მივაღწიო ისეთ ჟღერადობას, რომელიც სიჩუმის ზღვარზეა. რაც უფრო რთულდება თანამედროვე მუსიკალური ენა, მით უფრო ვცდილობ მივაღწიო ისეთ სიმარტივეს, რომლის მიღმა მუსიკალური ანბანი იწყება. თუ ჩემი გამარტივებული მუსიკალური ენა და სიჩუმის ზღვარს მიღწეული მუსიკა მსმენელის გარკვეული ნაწილის მოწონებას დაიმსახურებს, ჩავთვლი, რომ ჩემ შრომას ამაოდ არ ჩაუვლია. ყოველთვის მიმაჩნდა და მიმაჩნია, რომ მუსიკალურ სამყაროში აუთვისებელი სივრცის მოპოვება უკვე არსებულის განსხვავებულად წარმოჩენაა. ”დედა ენა, რომელიც გორის ბავშვთა გუნდს და ჩემ შვილიშვილებს მივუძღვენი - გახლავთ ზემოთ აღნიშნულის აღსრულების მცდელობა.”

17 ოქტომბრის კონცერტში მონაწილეობისთვის თბილისს ასევე ეწვევიან აღიარებული მევიოლინეები პაველ ვერნიკოვი და სვეტლანა მაკაროვა. შესრულდება ლეგენდარული კომპოზიტორის ნაწარმოები EX CONTRARIO ორი ვიოლინოსა და სიმებიანი ორკესტრისათვის. პროექტის მასპინძელია ევგენი მიქელაძის სახელობის საქართველოს ეროვნული სიმფონიური ორკესტრი, სამხატვრო ხელმძღვანელი და მთავარი დირიჟორი - ნიკოლოზ რაჭველი.

გია ყანჩელი:”ლათინურად EX CONTRARIO დაპირისპირებას ნიშნავს. უშედეგოდ ველოდებოდი განსხვავებული რელიგიების დაახლოებას. რაც უფრო მეტად იზრდებოდა ნაპრალი კონფესიებს შორის, მით უფრო მიჩნდებოდა სურვილი დამეწერა ნაწარმოები, რომელშიც აღმოსავლური და ევროპული ტრადიციების თანაარსებობის შესაძლებლობას გადმოვცემდი. EX CONTRARIO-ს პრემიერა იტალიის ქალაქ ვერონაში 2006 წლის ივლისში შედგა. მოხარული ვარ, რომ ამ ნაწარმოების პირველი შემსრულებელი - შესანიშნავი მევიოლინე პაველ ვერნიკოვი თბილისშია და სვეტლანა მაკაროვასთან ერთად წარსდგება ქართველი მსმენელის წინაშე.

პროექტის მხარდამჭერები: საქართველოს კულტურისა და ძეგლთა დაცვის სამინისტრო, კომპანია ბადაგონი, სასტუმრო ამბასადორი, ტელეკომპანია იმედი, რადიო ჰოლდინგი ფორტუნა, მედია ჰოლდინგი პალიტრა და საინფორმაციო ცენტრი 118 08

ბილეთები იყიდება

უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"

ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია

8-9 ოქტომბერს ძლიერი წვიმა და ქარია, 10-ში კვლავ გამოიდარებს - უახლოესი დღეების ამინდის პროგნოზი