გაერო-ს ლტოლვილთა უმაღლესი კომისრის საგანგებო დესპანი ანჯელინა ჯოლი დღეს, ბრიუსელში ნატო-ს გენერალურ მდივანს იენს სტოლტენბერგს შეხვდა.
იენს სტოლტენბერგმა ანჯელინა ჯოლი შეაქო იმ წვლილისთვის, რომელიც მას შეაქვს "საზოგადოებაში ქალთა როლის გაძლიერებისა და სექსუალურ ძალადობასთან ბრძოლაში".
ნატო-ს გენერალურმა მდივანმა ასევე აღნიშნა, რომ ალიანსს პასუხისმგებლობა აკისრია ქალთა უფლებების დამცველი იყოს.
ნატო-ს საბჭოსა და სამხედრო კომიტეტის სხდომაზე ალიანსის წარმომადგენლებმა და ანჯელინა ჯოლიმ სექსუალური და გენდერული ძალადობის პრევენციის კუთხით ნატო-ს ძალისხმევაზე ისაუბრეს.
"ანჯელინა ჯოლიმ და მე გადავწყვიტეთ ერთობლივად ვიმუშაოთ და ყურადღება სამ მიმართულებაზე გავამახვილოთ: ტრენინგები, მონიტორინგი და ცნობიერების ამაღლება", - განაცხადა იენს სტოლტენბერგმა.
შეხვედრის შემდეგ გამართული პრესკონფერენცია ნატო-ს ფეისბუქის გვერდზე გადაიცემოდა, მოგვიანებით კი ფოტოებიც გავრცელდა. ინტერნეტმომხმარებლებს შეუმჩნეველი არ დარჩენიათ ანჯელინას ჩანთა, რომელიც გენერალურ მდივანთან პოზირებამდე მსახიობმა იატაკზე დადო. ფოტოგადაღების დასრულების შემდეგ კი ჯოლის ჩანთის აღებაში სტოლტენბერგიც დაეხმარა.