"ისლამური სახელმწიფოს" ლიდერი აბუ ბაქრ ალ-ბაღდადი გასული წლის მაისში საჰაერო თავდასხმის დროს დაიჭრა და ამის გამო 5 თვის განმავლობაში ტერორისტულ დაჯგუფებას ვეღარ მართავდა. CNN-ის ინფორმაციით, ამის შესახებ აშშ-ს ხელისუფლებაში აცხადებენ.
სადაზვერვო სამსახურების წარმომადგენლების თქმით, მათ აქვთ სარწმუნო ინფორმაცია, რომ მსოფლიოს ერთ-ერთი ყველაზე საშიში ტერორისტი სირიაში, რაქასთან ახლოს დაიჭრა.
ბაღდადის ჭრილობები სიცოცხლისთვის საშიში არ იყო, თუმცა ჯიჰადისტების ყოველდღიურ ოპერაციებს ვეღარ უხელმძღვანელებდა.
იმ დროისთვის "ისლამური სახელმწიფო" ერაყის ქალაქ მოსულზე კონტროლს ნელ-ნელა კარგავდა, მათი ე.წ. დედაქალაქი რაქა კი აშშ-ს მოკავშირე ძალებს თითქმის ალყაში ჰქონდათ მოქცეული.
უცნობია, ვისი ნასროლი რაკეტით დაიჭრა ჯიჰადისტების ლიდერი. აშშ-ში არ აქვთ ინფორმაცია, ზუსტად რომელ დღეს დაიჭრა ალ-ბაღდადი.
"რაქაზე საჰაერო თავდასხმებს რუსეთიც ახორციელებდა, თუმცა ძნელად სათქმელია, ჩვენი თავდასხმის დროს დაიჭრა თუ - რუსეთის," - ამბობს CNN-ის წყარო.
აბუ ბაქრ ალ-ბაღდადი საჯაროდ მხოლოდ 2014 წლის ივლისში გამოჩნდა, მოსულში, ალ-ნურის მეჩეთში, რომელიც გასულ წელს ერაყის ჯარმა ჯიჰადისტებისგან გაათავისუფლა.
მას შემდეგ "ისლამურმა სახელმწიფომ" რამდენიმე აუდიოგზავნილი გაავრცელა, რომლის ავტორადაც ალ-ბაღდადის ასახელებდნენ. ბოლო ასეთი ჩანაწერი გასული წლის სექტემბერში გავრცელდა.
სხვადასხვა წყარო აშშ-ს სადაზვერვო სამსახურს სხვადასხვა ტერიტორიას უსახელებს, სადაც, შესაძლოა, "ისლამური სახელმწიფოს" ლიდერი იმყოფებოდეს. ტერიტორია იმდენად დიდია და მჭიდროდ დასახლებული, რომ კოალიციის ძალებს მისი დაკავება ძალიან უჭირთ.