თბილისის იერსახის თვითნებური შეცვლა, მათ შორის, შენობა-ნაგებობის ფერის შეცვლა - 500 ლარით დაჯარიმებას გამოიწვევს

თბილისის იერსახის დამახინჯებაზე ადმინისტრაციული სანქციები მკაცრდება. “ადმინისტრაციულ სამართლდარღვევათა კოდექსში“ დაგეგმილი ცვლილებები, რომელიც უმრავლესობის დეპუტატების მიერ არის ინიცირებული, პარლამენტს განსახილველად უკვე წარედგინა.

კერძოდ, თბილისის ტერიტორიაზე სხვადასხვა სახის წარწერების, ნახატების, სიმბოლოების თვითნებური შესრულება შენობათა ფასადებზე, ვიტრინებზე, ღობეებზე, სვეტებზე, ხე-ნარგავებზე, ფეხით მოსიარულეთა და სატრანსპორტო საშუალებების სავალ ნაწილზე, ასევე პლაკატების, ლოზუნგების, ბანერების განთავსება ისეთ ადგილებზე, რომლებიც საამისოდ გამოყოფილი არ არის, გამოიწვევს სამართალდამრღვევის დაჯარიმებას 200 ლარის ოდენობით, ნაცვლად დღეს არსებული, 50 ლარისა. იგივე ქმედების განმეორებით ჩადენა კი 1 000 ლარიან ჯარიმას, ნაცვლად - 500 ლარისა.

იერსახის დამახინჯებად განიხილება სხვადასხვა სახის წარწერების, ნახატების, სიმბოლოების თვითნებურად შესრულება ადმინისტრაციული ორგანოების შენობათა ფასადებზე, აგრეთვე მათ მიმდებარე ტერიტორიაზე, მათ შორის, ფეხით მოსიარულეთა და სატრანსპორტო საშუალებების სავალ ნაწილზე, რაც გამოიწვევს დაჯარიმებას 1000 ლარის ოდენობით, ნაცვლად 500 ლარისა, ხოლო ამ ქმედების განმეორებით ჩადენა გამოიწვევს დაჯარიმებას 2 000 ლარის ოდენობით, ნაცვლად 1000 ლარისა.

აღნიშნული სამართალდარღვევები და მათზე სანქციები “ადმინისტრაციულ სამართალდარღვევათა კოდექსის“ მიხედვით დღესაც მოქმედებს, თუმცა შესაბამისი მუხლი ზოგადად, ყველა მუნიციპალურ ტერიტორიას ეხება. პარლამენტში წარდგენილი ცვლილებებით კი, ცალკე დარეგულირებდა მხოლოდ თბილისის ტერიტორიაზე ჩადენილ სამართალდარღვევებისთვის სანქციების საკითხი, რომელიც გაცილებით მაღალი იქნება.