მორიგი დაკავება საზღვრისპირა სოფელში - შეიარაღებულმა ე.წ. მესაზღვრეებმა ადგილობრივი თამაზ ილურიძე დააკავეს

ოკუპირებული ტერიტორიის პერიმეტრზე, სოფელ ფლავისმანის განაპირას, შეიარაღებულმა ე.წ. მესაზღვრეებმა ადგილობრივი მცხოვრები თამაზ ილურიძე დააკავეს.

ილურიძე თანასოფლელთან, გელა გიუნაშვილთან ერთად პირუტყვს მწყემსავდა, როდესაც შეიარაღებული პირები გამოჩნდნენ. გიუნაშვილმა გაქცევა მოახერხა და მომხდარის შესახებ პოლიციას აცნობა.

მისი თქმით, ოკუპირებული ტერიტორიიდან გადმოსულ პირებს ავტომატური ცეცხლსასროლი იარაღების გარდა ყუმბარმტყორცნიც ჰქონდათ. გიუნაშვილი ამ წუთებში პოლიციაში დაკითხვაზე იმყოფება. თამაზ ილურიძე კი, სავარაუდოდ, ცხინვალის მილიციის იზოლატორში გადაიყვანეს.

ილურიძე ფლავისმანში მარტო ცხოვრობს. შესაბამისად, მის ახლობლებს არავინ დაკავშირებია. სოფელში ამბობენ, რომ ილურიძე და გიუნაშვილი საქართველოს ცენტრალური ხელისუფლების მიერ კონტროლირებად ტერიტორიაზე იმყოფებოდნენ და დეფაქტო რეჟიმის კონტროლირებად ტერიტორიაზე არ გადასულან. როგორც „ინტერპრესნიუსს“ სახელმწიფო უსაფრთხოების სამსახურში განუცხადეს, საქართველოს მოქალაქე ე.წ საზღვრის უკანონო გადაკვეთის ბრალდებით არის დაკავებული. ამოქმედებულია „ცხელი ხაზი“ და ინფორმირებულია ევროკავშირის სადამკვირვებლო მისია.