ავტორი:

"ჩვენ ვკარგავთ აფხაზეთს!" - რას წერს რუსი ჟურნალისტი რეგიონში სტუმრობის შემდეგ

"ჩვენ ვკარგავთ აფხაზეთს!" - რას წერს რუსი ჟურნალისტი რეგიონში სტუმრობის შემდეგ

"აფხაზეთმა წასვლა გადაწყვიტა, რადგან ის რუსეთს არ სჭირდება... “სულიერების ქვეყანა” ყოველდღიურად იცვლის ორიენტაციას..." - წერს Свободная Пресса-ს რუსი ჟურნალისტი და ბლოგერი ვიქტორ სოკირკოსი აფხაზეთში მოგზაურობის შემდეგ და თავის შთაბეჭდილებებზე ჰყვება.

მისი თქმით, ის რეგიონიდან მძაფრი შთაბეჭდილებებითა და ერთი დასკვნით დაბრუნდა - რუსეთი კარგავს აფხაზეთს.

“შესაძლოა, ეს ერთი შეხედვით დაუჯერებელი იყოს, თუმცა, სამწუხაროდ, ასეა... ამის მიზეზი სხვადასხვაგვარია, მათ შორის - ეროვნული ფაქტორები და სოციალური კრიზისი, რომელიც რესპუბლიკაში არ შესუსტებულა.

მთავარი პრობლემა, რასაკვირველია, ეკონომიკურია, აფხაზეთს არ ჰყოფნის ფული ცხოვრებისა და განვითარებისთვის. ეს ყველაფერი კი ჩანს პრაქტიკულად ცარიელ ყავის დასალევ ადგილებში, ფაცხებსა და რესტორნებში. იქ, სადაც ადრე მაგიდები ხმაურიანი სტუმრებით იყო სავსე, ახლა სტუმრების ცარიელ ჯიბეებში ქარი უბერავს... ამ ყველაფერს ერთი ახსნაც აქვს - აფხაზებს არასდროს უყვარდათ შრომა და შედეგიც სახეზეა...

დასამალი არაფერია, რესპუბლიკა სულ უფრო და უფრო მეტად ხდება რუსეთის ფინანსებზე დამოკიდებული. ვითარება კი საკმაოდ მძიმეა - საომარი მოქმედებების შედეგად, პრაქტიკულად განადგურდა სანატორიუმები, ჯანმრთელობის ცენტრები, გზები და ა.შ" - წერს რუსი ჟურნალისტი.

მისივე თქმით, ვიდრე აფხაზეთი საერთაშორისო საზოგადოების მიერ არ არის აღიარებული, ინვესტიციის ჩადებას არავინ რისკავს. მით უფრო, რომ რაულ ხაჯიმბას წინამორბედებს, სერგეი ბაღაფშსა და ალექსანდრე ანქვაბს რეგიონის განვითარებისთვის ბევრი არაფერი გაუკეთებიათ. ბოლო წლებში, იქ ტურისტების ნაკადმა საკმაოდ იმატა. ამასთან, ვიქტორ სოკირკოს თქმით, აფხაზეთიდან სოჭის ოლიმპიადისა და აფხაზეთში რუსეთის სამხედრო ბაზებისთვის გაზიდეს სამშენებლო მასალები, რაშიც აფხაზეთს საკმაოდ კარგად გადაუხადეს.

Свободная Пресса-ს სტატიაში ჟურნალისტი წერს, რომ 2014 წლიდან ვითარება ძალიან შეიცვალა. ვლადიმირ პუტინმა და რაულ ხაჯიმბამ ორმხრივ შეთანხმებას მოაწერეს ხელი თანამშრომლობისა და სტრატეგიული პარტნიორობის შესახებ, რასაც აფხაზეთში სოციალ-ეკონომიკური განვითარება და ფონის გაუმჯობესება უნდა მოჰყოლოდა, თუმცა ბევრი რამ ფურცელზე დარჩა.

“თავდაპირველად, აფხაზეთში რუსეთიდან 8 მილიარდი რუბლის გადარიცხვა იგეგმებოდა, თუმცა შემდეგ ეს ციფრი 4 მილიარდამდე შემცირდა. როგორც აფხაზეთში ამბობენ, ამ თანხის უმეტესობას რესპუბლიკამდეც არ მიუღწევია. კერძოდ, 2016 წლის საინვესტიციო პროგრამებისთვის განკუთვნილი 3,7 მილიარდიდან, აფხაზეთამდე მხოლოდ 180-მა მილიონმა მიაღწია.

ადგილობრივების თქმით, ბაღაფშისა და ანქვაბის დროს, 6 წლის განმავლობაში, ტურისტების ნაკადი საკმაოდ გაიზარდა და შემოსავალმა 32 მილიარდ რუბლს მიაღწია, მაშინ როდესაც ხაჯიმბას 3-წლიანი მმართველობისას რესპუბლიკაში მხოლოდ 5 მილიარდი ჩაირიცხა. ამასთან, სამშენებლო ბუმი დასრულდა, რამაც რუსი დამსვენებლებისთვის ყირიმის გახსნამაც შეუწყო ხელი - აფხაზეთში ტურისტების ნაკადი მკვეთრად შემცირდა. ამასთან, დაიწყო აფხაზური ბანკების რევიზია და აღმოჩნდა, რომ რესპუბლიკაში ფული არ არის, ანუ მაღალჩინოსნებსა და ბიზნესმენებს ის ქვეყნიდან გააქვთ.

არსებობს კიდევ ერთი ფაქტორი - საქართველოს სისტემატური მუშაობა. საქმე ის არის, რომ ქართველებს რამე განსაკუთრებული მიზეზების გამოგონება არ სჭირდებათ, ისინი უბრალოდ კონტრგამოსავლებზე მუშაობენ; რუსები უშვებენ თავიანთ ტერიტორიაზე აფხაზური სოფლის მეურნეობის ნაწარმს? – ქართული მხარე აცხადებს, რომ ყველანაირი მიზეზის გარეშე შეიძენს ყველაფერს, რასაც აფხაზეთში აწარმოებენ - თხილს, მანდარინს, თაფლს და ა.შ. თანაც საკმაოდ ღირსეულ ფასად," - წერს რუსი ჟურნალისტი.

მისივე თქმით, ყველაზე გენიალური სვლა არის საქართველოს მიერ შეთავაზებული ჯანდაცვის პროგრამა - ქვეყნის მთელ ტერიტორიაზე აფხაზებს შეუძლიათ სრული ჯანდაცვის მომსახურების უფასოდ მიღება. ეს ეხება კონსულტაციებს, ლაბორატორიულ და დიაგნოსტიკურ კვლევებს, ქირურგიულ ჩარევას.

”შესაძლოა, აფხაზეთს მოუწიოს დამოუკიდებლობის დავიწყება, რადგან ქართული არმია ეს აღარ არის 1992 წლის სამხედრო დაჯგუფება, მეტიც - არც 2008 წლის ცხინვალში მებრძოლი ჯარი. ის ახლა ნატო-ს სტანდარტების ინსტრუქტორების მიერ იწვრთნება და ეს არის 37-ათასიანი მოტივირებული სამხედრო მანქანა, რომელიც ბოლომდე მზად არის გაარღვიოს ენგური, სოხუმამდე ჩავიდეს და ასეთ დროს რუსეთს საქმეში ჩართვას არავინ ურჩევს, რადგან ბევრი რამის გათვალისწინებით, საქართველო ათასჯერ მართალი იქნება, რადგან ეს მისი მხრიდან ტერიტორიული მთლიანობის აღდგენაა,” – წერს ჟურნალისტი ვიქტორ სოკირკოსი და დასძენს, რომ საკუთრივ აფხაზურ მხარეს "ორი ათასიანი ხიშტით შეიარაღებული კაცის გარდა, არაფრის დაპირისპირება შეუძლია".

ბლოგერის მოსაზრებით, თუ მოსკოვს აფხაზეთში სერიოზული ინვესტიციების ჩადება არ შეუძლია, კარგი იქნება ბაზარი მაინც გაუხსნას აფხაზურ ნაწარმს, თუნდაც მინერალურ წყალს. მით უფრო, რომ ეკოლოგიურად სუფთაა ხილი და ბოსტნეული და კარგი იქნება ხილფაფებისა და მურაბების საკითხი მაინც მოგვარდეს:

“პრეზიდენტი რაულ ხაჯიმბა ბოლომდე დარწმუნებულია, რომ რეგიონში მასშტაბური პროექტები განხორციელდება, თუმცა ადგილობრივ მოსახლეობას ამის უკვე აღარ სჯერა... ახლა “აფხაზურ სამზარეულოში” ასეთი ხმები დადის - ჩვენ ყველა შემთხვევაში მოგვიწევს ვინმეს მივეყიდოთ, არადა, სულ ორი ვარიანტი გვაქვს - რუსები ან ქართველები, ამ უკანასკნელის უკან კი ამერიკა დგას... მოსკოვს ჩვენი დაუსრულებელი გაჭირვებითა და პრობლემებით აღარ ვჭირდებით, ამერიკა კი, კრემლის ჯინაზე მზად არის აფხაზეთის ეკონომიკაში დიდი ფული, თუნდაც 60 მილიონი დოლარი ჩადოსო" - ამბობენ ისინი პირად საუბრებში.

პუბლიკაციის ბოლოს კი სოკირკოსი წერს, რომ აფხაზეთის მოსახლეობის ნახევარი მაინც თბილისში, ზუგდიდსა და სხვა ქალაქებში ქართველი ექიმების პაციენტები არიან და ბოლო დროს, მათ უჭირთ ქართველში მტრის დანახვა: "ასე რომ, სულაც არ არის გამორიცხული, ერთ დღესაც აფხაზებმა საქართველოსკენ გაიწიონ. მაშინ კი მოგვიწევს ლოდინი, როდის ააფრიალებენ ქართველები ფსოუზე ნატოს დროშას," - წერს ბლოგერი.

"ქართველები ჩვენი მეზობლები არიან - ორმხრივი დიალოგის ფორმატი უნდა შეიცვალოს" - ასლან ბჟანია

"ორ კვირაში აფხაზეთში კორონავირუსი იფეთქებს..." - აფხაზები შიშობენ, რომ ადგილობრივების დიდი ნაწილი საშიშ ვირუსს ვერ გადაიტანს

პუტინი ასლან ბჟანიას ე.წ არჩევნებში გამარჯვებას ულოცავს - რა განცხადებას ავრცელებს საქართველოში აშშ-ის საელჩო