ფეხბურთის მსოფლიო ჩემპიონატზე ხორვატიის ნაკრების მიერ მიღწეული წარმატების პარალელურად სულ უფრო გაიზარდა ინტერესი ქვეყნის პრეზიდენტის მიმართ. კოლინდა გრაბარ-კიტაროვიჩი ეროვნული ნაკრების ძალიან დიდი გულშემატკივარია, არაერთ მატჩს ის პირადად დაესწრო და ფეხბურთელები გაამხნევა. გრაბარ-კიტაროვიჩი 1968 წლის 29 აპრილს დაიბადა. ის, უმეტესად, მშობლების სოფელში იზრდებოდა, ოჯახს ხორცის მაღაზია და ფერმა ჰქონდა. სტუდენტობის დროს გაცვლით პროგრამაში მიიღო მონაწილეობა და ნიუ-მექსიკოში გაემგზავრა.
იუგოსლავიაში დაბრუნების შემდეგ სწავლა ზაგრების უნივერსიტეტში განაგრძო, ის ინგლისური და ესპანური ენებისა და ლიტერატურის სპეციალისტია. 1995-1996 წლებში ვენის დიპლომატიურ აკადემიაში ისწავლა, 2000 წელს კი საერთაშორისო ურთიერთობების ფაკულტეტზე მაგისტრის ხარისხი დაიცვა.
მოგვიანებით, სწავლა განაგრძო აშშ-ში.
კოლინდა, ხორვატიულთან ერთად, თავისუფლად საუბრობს ინგლისურ, ესპანურ და პორტუგალიურ ენებზე, ასევე - აქვს გერმანულის, ფრანგულისა და იტალიურის საბაზისო ცოდნა. ხორვატიის ნაკრების ფინალში გასვლის შემდეგ სოციალურ ქსელებში გრაბარ-კიტაროვიჩი ძალიან პოპულარული გახდა. „ტვიტერზე“, „ინსტაგრამსა“ და „ფეისბუქზე“ აზიარებენ ქერა ქალების ფოტოებს საცურაო კოსტიუმებში და ამტკიცებენ, რომ ეს ხორვატიის პრეზიდენტია.
როგორც factcheck.afp.com წერს, ფოტოებზე გრაბარ-კიტაროვიჩი არ არის.
ქალი ჭრელი საცურაო კოსტიუმით ამერიკელი მსახიობი და მოდელი ნიკოლ ნატალი ოსტინია, რომელსაც კოკო ოსტინის სახელით იცნობენ. ფოტოები მაიამიში, 2009 წელს არის გადაღებული.
ნახეთ ვიდეო : ვინ არის ხორვატიის ნაკრების გამორჩეული გულშემატკივარი და მსოფლიოს ყველაზე ლამაზი პრეზიდენტი
კიდევ ერთი ქალი, რომელიც გრაბარ-კიტაროვიჩი ჰგონიათ, ჩეხეთიდან არის. 2008 წელს გადაღებული ფოტო, სადაც ქერა ქალი ლურჯი საცურაო კოსტიუმით პოზირებს, მისმა ქმარმა „გუგლის“ საკუთარ აგარიშზე ატვირთა. მოგვიანებით სურათი სხვადასხვა საიტზე, მათ შორის - პორნოგვერდებზეც გამოჩნდა. საბოლოოდ კი სოციალური ქსელების მომხმარებლების ნაწილმა ის გრაბარ-კიტაროვიჩს მიამსგავსა, ცრუ ინფორმაცია არაერთმა პორტალმაც გაავრცელა.
კოლინდა გრაბარი 1996 წელს იაკოვ კიტაროვიჩზე დაქორწინდა, წყვილს ორი შვილი ჰყავს.
უფროსი გოგონა, 17 წლის კატარინა ფიგურისტია. მეორე შვილი, ლუკა 2003 წელს შეეძინათ.