საქართველოს პირველმა ლედიმ ვიზიტით მყოფი იტალიის პრეზიდენტის ქალიშვილს კლაუდია მატარელას, ბავშვთა ჰოსპისში - „ციცინათელების ქვეყანა“ უმასპინძლა.
მაკა ჩიჩუასა და კლაუდია მატარელას ჰოსპისის დირექტორმა მამუკა მახათაძემ ბიბლიოთეკა, სარეაბილიტაციო მულტისენსორული კაბინეტი და სხვა სივრცეები დაათვალიერებინა და ცენტრის სერვისების შესახებ მიაწოდა ინფორმაცია. ჰოსპისში სტუმრობის შემდეგ საქართველოს პირველმა ლედიმ კლაუდია მატარელას მეგობრულ ლანჩზე უმასპინძლა.
ჰოსპისში სტუმრობისას მაკა ჩიჩუამ ჩაცმის თავისუფალი სტილი აირჩია - პირველ ლედის სპორტული შარვალი და სპორტული ფეხსაცმელი თეთრ პერანგთან ჰქონდა შეხამებული.
იტალიის დელეგაციის პატივსაცემად საზეიმო ვახშამი გაიმართა საქართველოს პრეზიდენტის ადმინისტრაციაში. ვახშამზე მაკა ჩიჩუა თვალისმომჭრელად გამოიყურებოდა - პირველ ლედის ყვითელი ფერის კაბა ეცვა. აღსანიშნავია, რომ გიორგი მარგველაშვილის მეუღლემ თმა დაიმოკლა და ახალი იმიჯი ძალიან უხდება.
ფოტოები: საქართველოს პრეზიდენტის ადმინისტრაცია