ძლიერმა სეტყვამ და წვიმამ განსაკუთრებით თელავი და მისი მიმდებარე სოფლები, ასევე ახმეტის მუნიციპალიტეტის ორი სოფელი დააზარალა. გუშინდელმა დაახლოებით ნახევარსაათიანმა სტიქიამ ახმეტის რაიონის რამდენიმე სოფელში ვენახები, სიმინდი, ხეხილის ბაღები და საკარმიდამო ნათესები გაანადგურა, ასევე, წააქცია ხეეები.
ძლიერმა წვიმამ და სეტყვამ პრობლემები შექმნა თელავშიც. სანიაღვრე არხებმა წყალი ვერ გაატარა, რის გამოც ღვარცოფმა ქალაქის რამდენიმე ქუჩა დატბორა და მოძრაობა შეაფერხა. ასევე დაიტბორა საცხოვრებელი სახლების პირველი სართულები.
"ყველა მეცოდება... მთელი წლის ნაშრომი 30 წუთში მიწასთან გასწორდა" - წერს ინტერნეტმომხმარებელი ვერიკო სახიაშვილი "ფეისბუქზე" და სტიქიის შემდეგ გადაღებულ ფოტოებს აქვეყნებს, რომელიც თელავშია გადაღებული.
საგანგებო სიტუაციების მართვის სამსახურის ინფორმაციით, თელავიდან და ახმეტიდან 51 შეტყობინება შევიდა.