რუსეთში საცხოვრებელ კორპუსში გაზი აფეთქდა - "შესაძლოა, 50 ადამიანი ნანგრევებში იყოს მოყოლილი"

რუსეთში ქალაქ მაგნიტოგორსკში საცხოვრებელ სახლში აფეთქების შედეგად დაღუპულთა რიცხვი ოთხ ადამიანამდე გაიზარდა. ამის შესახებ ჩელიაბინსკის ოლქის გუბერნატორმა ბორის დუბროვსკიმ განაცხადა.

„11:00 საათის მდგომარეობით საცხოვრებელ სახლში დარეგისტრირებული იყო 111 ადამიანი, 9 კი ქირით ცხოვრობდა (სულ 120 ადამიანი). 52 ადამიანის ბედი ცნობილია. აქედან 4 დაიღუპა, 16 ევაკუირებულია, ჰოსპიტალიზირებულია 4 ადამიანი, 28 კი კავშირზე გამოვიდა“, - განაცხადა გუბერნატორმა. შესაბამისად, ამ ეტაპისთვის უცნობია 68 ადამიანის ბედი. როგორც გუბერნატორმა აღნიშნა, შესაძლოა, 50 ადამიანი ნანგრევებში იყოს მოყოლილი.

შეგახსენებთ, რომ დღეს დილით ქალაქ მაგნიტოგორსკში საცხოვრებელ სახლში ბუნებრივი გაზის გაჟონვის შედეგად აფეთქება მოხდა. ადგილზე 469 ადამიანი მუშაობს სამაშველო ოპერაციის ფარგლებში.