"ერთი გარდაცვლილი სახლში უნახავს, მეორე კი, სახლის უკან" - ახალი დეტალები აბაშაში მომხდარ მკვლელობაზე

აბაშის მუნიციპალიტეტის სოფელ სამიქაოში მკვლელობა მოხდა. არსებული ინფორმაციით, მამაკაცმა სანადირო თოფით თანასოფლელი მოკლა, შემდეგ კი თავი მოიკლა.

Ambebi.ge-ს ინფორმაციით, გარდაცვლილები 1960 წელს დაბადებული ნ.მ. და 1968 წელს დაბადებული ბ.ა. არიან. ორივე მათგანი სოფელ სამიქაოს მკვიდრი იყო.

როგორც Ambebi.ge-ს სოფლის რწმუნებულმა ზაზა ვეკუამ განუცხადა, მომხდარს თვითმხილველი არ ჰყავს. მისთვის უცნობია, თუ რა იყო მკვლელობის მოტივი, თუმცა ამბობს, რომ ერთ-ერთ გარდაცვლილს ფსიქიკური პრობლემები ჰქონდა.

"ორივე გარდაცვლილი გვერდიგვერდ ცხოვრობდა. ვის სახლშიც შემთხვევა მოხდა, მათი მეზობელია, მოხუცი კაცია... როგორც ვიცი, მომხდარს ის არ შესწრებია, რადგან იმ დროს გარეთ იყო გასული. როდესაც სახლში შებრუნებულა, ერთი გარდაცვლილი იქ უნახავს, მეორე კი სახლის უკან იპოვა... სავარაუდოდ ამ მეორემ ჯერ მეზობელი მოკლა, შემდეგ კი თავი მოიკლა. ფსიქიკური პრობლემებიც ჰქონდა, მკურნალობდა კიდეც. როგორც ვიცი, მათ კონფლიქტი არ ჰქონიათ", -აღნიშნა ვეკუამ.

როგორც შინაგან საქმეთა სამინისტროს პრესსამსახურში აცხადებენ, მომხდართან დაკავშირებით გამოძიება სსკ-ის 108-ე მუხლით დიწყო, რაც განზრახ მკვლელობას გულისხმობს.