აქციის მონაწილეები „რესპუბლიკის მოედანზე“ შეიკრიბნენ და ორთაჭალაში, შინაგან საქმეთა სამინისტროს შენობასთან ავტომობილებით დაიძრნენ.
აქციის ერთ-ერთი ორგანიზატორის, სერგო გალსტიანის თქმით, პროტესტის მთავარი მოთხოვნა ამ მომენტისთვის არის ის, რომ შინაგან საქმეთა მინისტრი, გიორგი გახარია გადადგეს.
„ასევე, მეორე, არანაკლებ მნიშვნელოვანი მოთხოვნაა ის, რომ უნდა წავიდეს თანამდებობიდან ყველა მოსამართლე, ვინც ხელი შეუწყო ნაცემი და დარბეული ხალხის უკანონოდ დაპატიმრებას. ამას გარდა, ყველაზე მთავარი და მწვავე მოთხოვნაა, რომ 305 ადამიანი იყო დაკავებული და მათგან 5 უკვე გარეთ არის, ხოლო დანარჩენი 300 ადამიანი დღესვე უნდა გათავისუფლდეს. ისინი გადანაწილებულები არიან სხვადასხვა იზოლატორში, მათ ვერ პოულობს პატრონი, ვერ აწვდის სასმელსა და საჭმელს, ვერ ასაჩივრებს საქმეებს და ა.შ. შევიკრიბეთ საყვირებით და მანქანებით მივაკითხავთ შინაგან საქმეთა სამინისტროს, ხოლო მთავარი მოთხოვნების დასაკმაყოფილებლად, დღეს აქცია კვლავ გაგრძელდება 19:00 საათზე, პარლამენტთან. ეს იქნება იმავე ფორმატით, უფრო მეტი საინტერესო და არასასიამოვნო სურპრიზით მთავრობისთვის", - განაცხადა გალსტიანმა.