იტალიაში მცხოვრები ქართველი ემიგრანტი ნინო მიქაძე, რომელმაც ცოტა ხნის წინ კორონავირუსი დაამარცხა ემოციურ პოსტს და ფოტოებს აქვეყნებს, სადაც ჩანს, რა მძიმე მდგომარეობაში იყო ქალი დაავადებასთა ბრძოლის დროს.
იტალიელები მას "ნინა ჯორჯიანას" ეძახიან. წლების წინ თავადაც მედიცინის მუშაკი იყო, დღეს კი კონდიტერია და საავტორო კერძების რეცეპტები აქვს.
აი რას წერს ქართველი ემიგრანტი, რომელიც რამდენიმე დღის წინ გამოჯანმრთელდა კორონავირუსისგან:
"ფოტოები, რომელსაც არ ვაქვეყნებდი, მაგრამ სამწუხაროდ, იძულებული ვარ დავდო... დიახ ეს მე ვარ. ამ ორ ფოტოზე, იცით განსხვავება რა არის? პირველში ვებრძვი უხილავ მტერს, მეორეში კი ზავდადებული ვარ, ექვსი დღის უძინარი. დამამშვიდებელს არ მაძლევდნენ, რადგან საშიშროება იყო, რომ ვერ გამოვიღვიძებდი.
მახსოვს, როდესაც პირველი ჟანგბადის ნიღაბი გამიკეთეს, ირგვლივ როგორ მიწვავდა შიგა რეზინი სახის კანს და როგორ მიწიოდა ყურში. დამჯდარი ვათენებდი და ვაღამებდი. ამ სამყაროს ჩემად ვერ აღვიქვამდი, ჟანგბადი არ მყოფნიდა და ვიხრჩობოდი, მაგრამ უფლის წყალობით და თქვენი ლოცვით მე გადავრჩი.
არ ვიცი ამ ჩემს პოსტს ვინ როგორ მიიღებთ, მაგრამ ვალდებული ვიყავი, ჩემი ეს ჯოჯოხეთური დღეები, თქვენთვის მეჩვენებინა. ორგანიზმი ინდივიდუალურია და ყველას სხვაგვარად ხვდება ამ მონსტრს. ამიტომ ნუ ვეთამაშებით სიცოცხლეს, დაიჯერეთ რომ არსებობს ეს წყეული ვირუსი და არავინ იცის, როდის მოგვადგება კარს. დარჩით სახლში!" - წერს ნინო მიქაძე.