"ქალბატონთან ერთად, რომლისგანაც დავინფიცირდი, უბრალოდ, ერთ ოთახში ვიყავი" - ნოდიკო ტატიშვილს კორონავირუსი დაუდასტურდა

ნოდიკო ტატიშვილს რამდენიმე საათის წინ კორონავირუსი დაუდასტურდა. AMBEBI.GE მომღერალს დაუკავშირდა:

"გუშინ გამიკეთდა ტესტი და სუსტად დადებითი პასუხი იყო. შემდეგ საჭიროდ ჩათვალეს, ტესტი გამეორებულიყო და უკვე "კოვიდ დადებითი" აღმოვჩნდი. მანამდე არ მქონდა არანაირი სიმპტომი," - აღნიშნავს მომღერალი და დასძენს, რომ გასულ ხუთშაბათს ჰქონდა შეხვედრა ქალბატონთან, რომელსაც შაბათს კორონავირუსი დაუდასტურდა.

"იმ ქალბატონთან არანაირი ფიზიკური სიახლოვე არ მქონია, არც ხელი ჩამომირთმევია და არც მიკოცნია, უბრალოდ ერთ ოთხში ვიყავით პირბადეებით, სადეზინფექციო ხსნარით დამუშავებული ხელებით. თუმცა, როდესაც გავიგე, რომ მას პარასკევს მაღალი სიცხე ჰქონდა, გადავწყვიტე, თვითიზოლაციაში გადავსულიყავი. შეხება და კონტაქტი არავისთან მქონია, არც მშობლებთან, არც მეგობრებთან. ამ დღეების მანძილზე გარეთ არ გავსულვარ. დღეს მამამ მომიტანა პროდუქტები და კარებთან დამილაგა.

კვირა, ორშაბათს არანაირი სიმპტომი არ მქონია, არც სამშაბათს, მაგრამ ლაბორატორია მაინც გამოვიძახე და ტესტი გამიკეთეს. როგორც გითხარით, სუსტად დადებითი აღმოჩნდა და დღეს უკვე დადებითი,“ - გვიყვება ნოდიკო.

- მინდა, ყველას ვუთხრა, მოვუწოდო, რომ თუკი ვინმეს სიცხიანს ნახავენ, ან სიცხიანთან ექნებათ კონტაქტი, მაშინვე თვითიზოლაციაში გადავიდნენ, რადგანაც ბევრი ადამიანია, ვისაც უსიმპტომოდ აქვს ვირუსი. მათ შეიძლება, გადასდონ ხანდაზმულებსაც და ქრონიკული დაავადებების მქონეებს... რაც მთავარია, გამოიყენონ პირბადე, სადეზინფექციო ხსნარები და დაიცვან დისტანცია... მე არავისთვის გადამიდია... იმედი მაქვს, რომ კარგად ვიქნები.

- ტემპერატურა არ გაქვს?

- გუშინ გავიზომე და 37.4 იყო, დილას - 37.1, მერე - 36.6. ახლა როცა გავიგე, რომ კოვიდი დამიდასტურდა, 37.5 მაქვს. არ მახველებს და არაფერი მაწუხებს. უფრო ფსიქოლოგიური მომენტია, რაღაცებს ვაკვირდები და მგონია, რომ რაღაცები მართლა მაწუხებს. რეალურად ცუდად არ ვარ და იმედია, ცუდად არ ვიქნები.

- ახლა სახლში ხარ?

- კი, სახლში ვარ და ველოდები, ექიმმა უნდა დამირეკოს.

- გამოჯანმრთელებას გისურვებ!