რამდენი საწოლია თავისუფალი საქართველოს მასშტაბით - ჯანდაცვის მინისტრის ინფორმაცია

ძალიან კარგად ხდება პაციენტების მართვა აჭარაში და საწოლფონდის მობილიზაცია არის მაქსიმალური, - ამის შესახებ ჯანდაცვის მინისტრმა ეკატერინე ტიკარაძემ განაცხადა.

მისივე თქმით, შეხვედრები გაიმართა კლინიკურ ჯგუფთან და სასტუმროებთან, რისი მიზანიც პაციენტების ბრუნვის გაუმჯობესებაა.

„დღეს ჩვენ აჭარაში ვიმყოფებით და შესაბამისად საკოორდინაციო საბჭოზე ჩართვა აჭარის ტერიტორიიდან მოხდა. აჭარაში საკმაოდ მძიმე მდგომარეობა გვაქვს და ვიზიტის მიზეზიც გამომდინარეობს აქედან, თუმცა მნიშვნელოვანია, რომ ძალიან კარგად ხდება პაციენტების მართვა აჭარაში და საწოლფონდის მობილიზაცია არის მაქსიმალური. ჩემი და ჩემი მოადგილის მხრიდან დამატებით გაიმართება შეხვედრები კლინიკურ ჯგუფთან, რისი მიზანიცაა პაციენტების ბრუნვის გაუმჯობესება და ასევე ჩვენ გვექნება შეხვედრები სასტუმრო „სექტორთან“ ვინაიდან, ამოცანა და მიზანი არის, რომ მოხდეს პაციენტების დროული გაწერა და გადაყვანა მათი საავადმყოფოებიდან სასტუმროებში, სადაც არიან ასევე ექიმები.

დღესდღეობით აჭარას მობილიზებული სასტუმრო სივრცეებისთვის ჰყავს 200-მდე ექიმი და 300-მდე ექთანი. მნიშვნელოვანია, რომ მოხდეს მაქსიმალური დაჩქარება პაციენტების ბრუნვის და მსგავსი ხორციელდება საქართველოს ყველა რეგიონში, რათა არ მოხდეს არც ერთი პაციენტის დატოვება ყურადღების გარეშე.

დღეის მდგომარეობით ჩვენ ვმართავთ 48 ათასამდე აქტიურ შემთხვევას. მათგან 38 ათასი შემთხვევა იმართება ბინაზე ოჯახის ექიმების მხრიდან და ყოველდღიურ რეჟიმში ხდება გაფართოება ოჯახის ექიმების ქსელის. აქტიურად ემატება ყოველდღიურ რეჟიმში 40-მდე ადამიანი იმისათვის, რომ არ იყოს შეფერხება პაციენტების მომსახურებაში. მობილიზებულია 8 000-მდე საწოლი. ეს არის ის ნიშნული, რაც შეგვეძლო ჰოსპიტალურ სექტორში გაგვეკეთებინა. ამ ეტაპზე სრულიად საქართველოს მასშტაბით თავისუფალია 500-მდე საწოლი“, - განაცხადა ეკატერინე ტიკარაძემ.